Chhattisgarh-a 1st Khelo India Tribal Games 2026 neih mekah Mizoram nulate chuan gold medal an hlawh chhuak zo ta lo va, Nilaini tlaia hockey (hmeichhia) final-ah Odisha lakah si khat faia tlawmin silver medal an la.
Sardar Valabhbhai Patel International Hockey Stadium, Raipur-a final-ah hian quarter thumnaa Ajmina Kajur-i vuak luh sut thei lovin Mizoram hi a tlawm zawkah an tang.
Mizo nulate hian February 20-27 chhunga Seletion Trial Phase II-ah khan India rama hockey hmunpui tling, Odisha nulate hi an lo hneh tawh a. Inelna tak takah pawh a khelh hrim hrimah chuan a hniam zawk an ni lo va, vuah luh theihna hun tha pawh vawi tam tak an nei a, ‘an vanduai’ ti pawhin a sawi theih a ni.
Sports & Youth Services coach Lalrothuami kaihhruai Mizoram team hian an tum ber nomawi hawn thei ta lo mah se tun games-ah hian an che tha hle a. Group stage-ah an tumpui team thum lakah goal 26 zet vaw lutin an lamah goal khat chiah a lut a. Semifinal-ah pawh selection trial-a an hneh loh, Jharkhand lakah pawh phuba lain 3-2-in an hneh theih a ni.
Khelo India Tribal Games hi a vawi khatna niin Chhattisgarh-in an thleng a. Infiamna hrang hrang – thalkah, athletics, football, hockey, tuihleuh, volleyball, ritchawi leh wrestling bakah Mallakhamb leh Kabaddi-ah inelna neih niin Raipur, Jagdalpur leh Surguja khawpuiah hengte hi khelh a ni hlawm.
Games-a tel tur hian qualifying round (selection trial) paltlang vek ngai niin Mizoram hmeichhe hockey team pawh hian Selection Trial Phase II-a team 17 an inlan atangin inelna tak tak khel turin an tling a ni.
Mizoram atangin hockey (hmeichhia) bakah hian football (mipa), ritchawi leh wrestling-ah infiam mite an inlan a, an che tha hlawm viau bawk.
Mizoram Squad:
Peniel Lalruatsangi (GK) Durtlang [NCOE, Imphal]
Lalnunfeli Kawnpui [NCOE, New Delhi]
Vanlalrinhlui Durtlang [NCOE, New Delhi]
Manglawmsang Durtlang [STC Thenzawl]
Rochanhlui (GK) Bawngkawn [STC Thenzawl]
Zothanmawii Lungpho, [STC Thenzawl]
Lalpeksangi Rotlang ‘W’, [NCOE, Kolkata]
Laltlanchhungi Durtlang, [NCOE, Kolkata]
Lalfakawmi Lungmuat, [NCOE, Kolkata]
Loicy Laltanpuii Kolasib, [NCOE, Kolkata]
F.Lalbiaksiami Lunglei, [NCOE, Bangalore]{India Junior Women Camp}
Lalneihpuii Denlung, [NCOE, Bangalore]{India Junior Women Camp}
Lalrinpuii Hnahthial, [NCOE, Bangalore]{India Junior Women Camp}
Ruthi Lallawmzuali Siaha, [NCOE, Bangalore]{India Junior Women Camp}
Z.Laldintluangi Lunglei, [NCOE, Mumbai]
Agnes Malsawmkimi (C) Serchhip, (Western Railways)
Marina Lalramnghaki Kawnpui, (South Eastern Railways)
Lalrindiki Hnahthial, (Central Railways)
Team Coach: Lalrothuami, Mamit, (SYS Hockey Coach)
Team Manager: Lalzawnchhungi, Durtlang (SYS Hockey Coach)