Aizawl: Chief Minister Lalduhoma chuan Serchhip District Hospital-a Dialysis Unit thar nimin khan a hawng.
Hawnna inkhawmah chief minister chuan khawtlang hruaitute inpekna zarah Serchhip damdawi inah dialysis khawl hawn a ni ta chu lawmawm a tih thu sawiin tha taka hna a thawh theih nan mamawh dang la awm angte pawh ngaihtuah belh zel a nih tur thu a sawi a. Thawktute inthlahdah vanga damlote tawrhna hi thleng lo se, hah chung pawhin nunna chhanna a nih avangin thawk hram zel turin a chah.
Bialtu MLA ni bawk chuan Mizo zingah AIDS, cancer leh natna khirh tak tak vei an tam ta lutuk chu an duh an thlang sual deuh em tih chu a ngaihtuahna a nih thu sawiin, “Natna tam tak kan pumpelh theih a awm a, kan nun kan uluk hi a tul a. Pathian hian kan hrisel a phal a, kan hausak pawh a phal a ni tih hi hria ila, kan damna hi Pathian hnenah a awm a, kan thing leh mau leh nungchate pawh zalen se, mipuite pawh hrisel ila, Pathian malsawmna kan dawng zel ang,” a ti.
Lalduhoma chuan Serchhip District Hospital main building tur sakna tur Rs vbc 50 dawn fel a ni tawh a, tender chhuaha hnathawh chhunzawm thuai a ni dawn tih a sawi.
Inkhawma tar lan a nih danin Serchhip District Hospital-a dialysis khawl hi kum 2025 khan dawn a ni a. He khawl hi thawktu doctor leh technician pakhat ve ve, Staff nurse pahnih leh RO incharge pakhatin an enkawl dawn a. Vawiin atangin dialysis hi tih tan nghal tum a ni.
Khawl pahnih hmangin chawhmaah leh chawhnuah mi pahnih ve ve, a vaiin ni khatah mi pali an enkawl thei dawn a. Chawlhkar khatah mi pakhat tan vawi hnih a tih theih dawn a. Sorkar chawlhah leh thla tin Inrinni vawi hnihna an awl thin ang. Natna khirh bik Hepatitis leh HIV veite erawh chu a hranpaa enkawlna pek ngai an nih avangin dialysis hi an tih sak thei rih dawn lo thung.
Dialysis khawl bunna senso atan hian MLA fund Rs. 15,04,000 leh Technician hlawh tur Rs. 1,38,000 dawn a ni a.