Aizawl: Mizoram Information Service Association (MISA) chuan I&PR Conference Hall, Lianchhiari Run-ah nimin khan 2026 MISA General Conference an hmang a. He hun hi Betsy Zothanpari Sailo, IPRP&S Department Secretary chuan khuallian niin a hmanpui.
Khuallian Betsy Zothanpari Sailo chuan MISA Conference hlawhtling taka hman theih a ni chu lawmawm a tih thu a sawi a. MISA member-te chu intuaithar a, ram leh hnam tana chhenfakawm lehzuala sorkar kum thar tana inhlan thar turin a chah a. Mipui vantlang tana information pawimawhna leh sorkar hmel tar langtu an nihna dinhmun pawimawhnate ngun taka ngaihtuah a, Conference chu hlawk taka hmang theuh turin duhsakna a hlan.
MISA General Conference hi chawhma lamah hawnna hun hman niin, MISA Vice President Pratap Chhetri-a’n a kaihruai a. MISA President Malsawmsanga’n kalkhawmte lawmna thu a sawi a. MISA General Secretary Andrew H. Lalremruata’n report a pe a, I&PR Director & MISA Patron K. Vanlalsangi’n thu a sawi a. Nikum lama MPSC buatsaih Civil Services Combined Competitive Examination-a lut thar MIS officer-te lawm luh nghal an ni a. MISA Treasurer C. Lalremruati’n lawmthu sawiin hun hi a khar.
Chawhnu lamah rorelna leh MJA General Headquarters hruaitute kaihhruaiin 2026-28 atana MISA hruaitu tur thlanna hun hman nghal a ni.