FIFA World Cup 2026 ah ram 48 an tel dawn a. Team tha tak tak, player nei tha va tak eng emaw zat chu qualifier leh play-off ah an tling zo ta lo a ni.
Hetianga ram thenkhat tel ve thei ta loa footballer tha leh lar eng emaw zat chu an hmel kan hmu thei dawn ta lo a. Chutianga tel thei lo tur langsar zual thenkhat han thur chhuak ila.
- Robert Lewandowski (Poland): Poland tana goal thun hnem ber leh a hun laia striker ropui berte zinga mi, Lewandowski hian Albania nen playoff semi-final an khelh tumin goal a thun a, beiseina a la nung hle. Mahse, Poland hian playoff final-ah Sweden chu 2-3 in an hneh lo a, hun tawp lama Viktor Gyökeres-a goal khung vangin an tling thei ta lo. Tun tum hi Lewandowski-a World Cup zinkawng tawpna a ni tawh mai thei a, 2022-a a inlan bak kha chu a belh tawh hmel loh. A goal khung hriam tak te, boruaka ball a chan theihzia leh a hruaitu nihna thate chu khawvel huap inelnaah hmuh tur a awm tawh dawn lo a ni.
- Gianluigi Donnarumma (Italy): Italy leh PSG goalkeeper sang tha tak, khawvela goalkeeper tha berte zinga mi hian UEFA play-off final-ah Italy a chhan zo ta bik lo. Italy hian Bosnia and Herzegovina chu 1-1 in an draw a, mahse penalty-ah 1-4 in an tlawm ta a ni. Hei hi Italy-in a zawna World Cup vawi thum an khelh lohna tur a ni a, vawi li lai champion tawhte tan chuan zia lo tak a ni. Donnarumma-a ball dan thiamzia leh a theh chhuah that ziate chu 2026 inelnaah hian hmuh tur a awm dawn lo.
- Christian Eriksen (Denmark): Danish playmaker leh midfield maestro tawn hriat ngah tak hian a ram chu play-off final a thlenpui zo ta lo. Denmark hian Czechia chu 2-2 in an draw a, penalty-ah 1-3 in an tlawm a. Club lama la ropui reng, Eriksen-a mit fing tak te, ball pek theih chin zau tak leh set-piece a chhuih thiam ziate chu kumin World Cup ah hian hmuh tur a awm dawn ta lo a ni.
- Khvicha Kvaratskhelia (Georgia): ‘Kvaradona’ tia hriat lar, winger thiam leh a che vel hmuhnawm tak hian Euro 2024-ah mi mit a la hle a, club lamah pawh a ball khalh thiamzia, a chakzia leh goal a thun theihziate a lantir reng a. Georgia hi UEFA qualifying group atangin an tling lo a, play-off pawh an thleng zo lo a, tunlaia khawvela attacker hmuhnawm berte zinga mi hi team 48 telna inelnaah hian kan hmu thei dawn ta lo a ni.
- Victor Osimhen (Nigeria): Goal khung khawl lian leh chak tak, Africa-a forward tha berte zinga mi, Osimhen-a’n Super Eagles chu CAF qualifier khirh takah a tlinpui zo lo. Nigeria hi DR Congo lakah play-off-ah mak takin an tlawm a, a zawnin World Cup an khel dawn ta lo a ni. Kumina inelnaah hian goal hmaa hlauhawm tak leh he player chak tak mai hi hmuh tur a awm dawn lo.
Tel lo langsar dangte:
Dominik Szoboszlai (Hungary): Hungary chu a tawp lama an chet chhiat avangin play-off an thleng zo lo.
Riccardo Calafiori (Italy): Arsenal defender thiam tak chuan Italy an qualify loh avangin a khel dawn lo.