Aizawl: Aizawl: Indira Gandhi National Open University (IGNOU) chuan Thawhlehni khan India ram hmun hrang hranga IGNOU regional centre thlan bik 39-ah zirlai pass tharte hnena certificate hlanna hun, convocation vawi 39-na an hmang.
Convocation hmanna pui ber chu New Delhi-a Baba Saheb Ambedkar Convention Centre, IGNOU Headquarters, Maidan Garhi-ah India Vice President CP Radhakrishnan hoa hman a ni a, hemi rual hian India-a IGNOU Regional Centre hmun 39-ah a ruala hman niin zirlai nuai 3,13,770-ten degree an dawng a. IGNOU Regional Centre, Aizawl atangin mi 1,200-in degree an nei thar.
IGNOU Regional Centre, Aizawl-a convocation hmannaah hian NIT Mizoram Director Prof Dr S. Sundar chuan khuallian niin a hmanpui a. IGNOU chu khawvel pum huapa open university zingah chhawrtlak thiamna pek chhuah kawngah a tha ber pawl a ni tih a sawi a. Tunlai khawvelah AI-in mihring hna tam tak a luahlan rualin technology vek chuan kawng hrang hrangah hna dang a siam belh teuh thung tih a sawi a, heta chhawr theih tur thiamna skill neih a pawimawh hle tih a sawi a. Zirlai degree nei tharte a lawmpui thu sawiin an thiamna leh theihnate tipunga India ram hmasawn zel nan theihtawp chhuah turin a fuih.
IGNOU Regional Centre Aizawla zirlai 1,200 degree an nei thar a, heng zingah master degree nei thar 501, bachelor degree nei thar mi 624, postgraduate diploma pahnih, diploma 12 leh certificate programme learner 49 an ni.