India ram chhiarpui, Cencus of India 2027 neih mekah nimin khan governor, General (Dr) Vijay Kumar Singh a inziak lut.
Thawhlehni chawhma khan larsap hian Lok Bhavan-ah Chhiarpui, Census of India 2027 Phase-I (Houselisting leh Housing Census) hnuaia self-enumeration-ah hlawhtling takin a inziak lut a, India-a digital census hmasa ber kalpui chhoh mek a ni chu lawmawm a tih thu sawiin Mizoramah pawh he hmalakna hi hlawhtling taka neih a nih ngei theih nana theihtawp chhuah turin thawktu zawng zawngte a chah.
Larsap chuan Mizo khawtlang nunah mi dang tanpuina duhna a beh ngheh tlat thu sawiin, chhiarpui buaipuitute chu an hnathawh a lo awlsam zawk theih nan village council leh local council-te nen thawhdunna ngai pawimawh turin a chah a. Mizoramah chhiarpui tluang leh tha thei ang bera kalpui a nih theih nana theihtawp chhuah tura chahin duhsakna a hlan.
Chhiarpui 2027 hi India rama digital census hmasa ber tur niin thawh hniha kalpui tur a ni a. Thawh khatna Houselisting leh Housing Census hi April 1, 2026 atanga kalpui tan a ni a. Thawh hnihna Population Enumeration hi February, 2027-ah neih tan tur a ni a. Self-Enumeration hun hi April 1 atanga April 15, 2026 thleng a ni a, April 16 atanga May 15, 2026 thleng House Listing leh Housing Census Mizoram pumpuiah kalpui a ni ang.