MNF Treasurer Lalruatkima chuan Aizawl leh Zoram tan MNF an tha ber tih a sawi a. Hmun dangah state capital sawn ve an tum lo tih a sawi.
Tuikual South Jubilee Hall-ah AMC inthlan lo awm tur atana Tuikual Unit MNF inhmuhkhawm buatsaih Thawhlehnia a hmanpuinaah MNF Treasurer Lalruatkima chuan, Zofate Jerusalem Aizawl enkawl tur hian Nationalist party MNF an tha ber tih sawiin, “Pathian leh kan ram tan tia bei tlattu, he ram leh he hnam chhiat leh thata mawh la ngam MNF hi Aizawl leh Zoram tan kan tha ber,” a ti a. MNF chuan Aizawl State Capital hi hmun danga sawn ve an tum lo tih a sawi.
Lalruatkima chuan MNF-in Aizawl leh Mizoram tana hmasawnna hna a thawh tawh zawng zawngte thlir hian a ropui a. Hmuhnawm tham a tling a ni a ti a. “Engmah ti mang lova min puhtute dawt sawi hi a hre chiangtute chu mipui an ni a. Pathian leh mipui zarah kum 2028-ah MNF hi a sorkar leh dawn a, he hnam leh ram tan leh kan sakhaw tan kan beih chhunzawm zel dawn a ni,” a ti.
MNF Treasurer chuan, “Aizawl khawpui enkawl tur AMC inthlanah MNF-in candidate kan nei tha ber a. Kan candidate zingah AMC corporator/Councillor thin mi pali awmin, Mizoram sorkara Secretary pension, Sport lama India ram aiawh mekte, Kohhran Upa, Bial KTP Leader leh YMA hruaitute, Zoram thalaite entawn leh ngaihsan rawn te an awm a ni,” a ti a. Party dang enin MNF team-te an chhuanawm hle a, MNF-in AMC atan team tha tak an din chu pawmpuia, Aizawl khawpui hmasawn nan a vote pui vek turin mipui a ngen.