Aizawl: Tourism Minister Lalnghinglova Hmar chuan Champhai Vengsanga Heritage & Cultural Center sakna tur, Keilungliah-a Eco Resort Experience siamna tur leh New Champhaia Artificial Turf phahna tur lungphum te chu khuallian niin Thawhlehni khan a phum.
Thangtea Hall, Champhai Kahrawtah lungphun hawnna inkhawmah Lalnghinglova Hmar chuan ni khata project pathum ngawt hawn theih a ni chu lawmawm a tih thu sawiin, Champhai tana ni chhinchhiah tlak a ni tih a sawi a. Champhai mipuiten anmahni ta tur a ni tih hre reng turin a chah.
Heritage & Cultural Centre chuan meeting hmunhma a nei dawn a, conference hman nan miin an hmang dawn tih sawiin, vantlang mipuite a enkawlna leh venhimna kawngah pui turin a sawm.
Keilungliah-a Eco-Resort pawh khualzin tam tak tan ei leh in, riahna hmun tha tak a awm belh phah dawn avangin Champhaiah mi a hip belh ngei a beisei thu a sawi. Champhai mipuiin khualzin dawnsawn dan an thiam chhoh a ngai dawn hle a, theih ang anga inzir turin mipuite leh khawtlang hruaitute a fuih a. Champhaiah hian District Tourism Office hawn a nih tur thu leh Champhai Tourist Lodge siam that tur thu a puang bawk.
Artificial Turf sak chungchangah New Champhaia football field tha tak an nei thei tur hi a lawmpui thu a sawi a, inkhel hmuhnawm buatsaih a nih ngei a beisei thu sawiin Champhai District Football Association (CDFA) leh khawtlang mipuiten tha taka enkawl turin a sawm a ni.
Heritage & Cultural Center leh Keilungliah-a Eco Resort Experience hi Swadesh Darshan 2.0 hnuaia Tourism Department hmalakna a ni a. Artificial turf phahna tur hi Ministry of Tribal Affairs hnuaia PMJVK scheme hmanga Sports & Youth Services hmalakna a ni.