Rio Ferdinand chuan Manchester United chu nipui transfer inhawn hunah an squad thuam chak turin a ngen a, midfield-a player thar lak luh chu ngaih pawimawh hmasak berah nei tura a duh thu sawiin hmun dangah pawh player thar lak belh bawk turin a ti bawk.
Manchester United chu tun dinhmunah 2025-26 Premier League-ah pathumna an ni mek a, khelh hmabak pasarih an la nei a. Table-a an kaisan theih chhan hi club enkawl lailawktu, Michael Carrick-a hnuaia an khelh that vang a ni.
An player hluiin a enkawl tirh atangin vawi khat chiah an la tlawm a, vawi sarih hnehna changin season thara Champions League-a inlan theihna hun an nei tha hle a. Carrick-a hi a nghetin he hna hi an pe dawn em tih erawh hriat chian a la ni lo.
Defender hlui, Ferdinand-a chuan club hma lam thlirin nipui bazar inhawn huna player thar la lut ngei turin a duh tih a sawi a. “United hian bazar inhawn hunah player pali la lutin chung zinga pahnih chu bul tantu ni thei tur an nih a ngai,” a ti.
“Keimah hi club enkawltu chu ni ila ka ngaih pawimawh hmasak ber tur chu central midfielder pahnih an ni ang a, pakhat chu bul tantu tur leh a dang chu player naupang zawk, Bruno Fernandes leh Kobbie Mainoo te kara inrawlh ve thei tur chi a ni ang,” a ti.
A sawi zelnaah, “Tichuan, forward dang ka zawng bawk ang. Kan neih sate nena inthlak thleng thei tur player naupang zawk ka melh ang a, chu bakah full-back pakhat lak luh ka tum bawk ang. Chu zawng chu a ni mai. Player thar 10 kan mamawh emaw, position tam tak siam that ngai a awm emaw a ni thei. A vaia thlak kual vek a ngaiin ka hre lo, player thar pali lak luh chu thil hautak ni tho mah se thil tih tul tak a ni miau si a ni,” a ti.