Aizawl: Revenue Minister B Lalchhanzova chuan ZPM khawpui sorkar a ding a nih chuan building chhawng tinin pass a neih theih nan theihtawp an chhuah dawn tih a sawi.
ZPM Thalai buatsaihin nimin khan Aizawl Municipal Corporation (AMC) inthlan tur atan Armed Veng, Chhinga Veng, Chawnpui, Ramrikawn leh Vaivakawnah te street campaign neih a ni. He huna thusawitu zingah Revenue Minister B Lalchhanzova chuan AMC hi mipuite phurrit thlentu tur ni lovin khawpui nuam, him leh eizawn awlsamna, dan lalna hmun a ni tur a ni a, rethei ber te pawhin an chanvo an chan theihna a ni tur a ni a. AMC hi duhsak zawngte contract pekna ang tiat velah sorkar hmasate khan an suih tê zo vek a, Aizawl khawpuia cheng ten inpawh tlang taka ro an rel hona tur a nih thu a sawi.
B Lalchhanzova chuan, “Hun hmasa lamah AMC sum hmuh leh hman dante a langtlang tawk lo hle a, ZPM corporator-te erawh an sum hmuh angte an hmang thain a langtlang hlawm hle a. Mipuite khawngaihna changa ZPM khawpui sorkar a lo ding a nih chuan sum hmuh leh hmante langtlang taka kalpui tur a ni a, mipui thlim zawngin emaw, mipui biruksan ang chiin emaw hmalak a ni lo ang. Dan ang takin Ward Committee kaltlanga hnathawh zel a ni ang a, khawpui fai leh mawi din tura theihtawp chhuah a ni ang a, building chhawng tinin pass a neih theihnan theihtawp chhuah a ni ang,” a ti.
Hmun hrang hranga street campaign neihnaah B Lalchhanzova bakah Minister Lalthansanga, Adviser to CM TBC Lalvenchhunga, MLA leh T Lalhlimpuia, MLA te pawhin thu an sawi bawk.