Nilaini, 15th April 2026 khan Review committee on The mizo marriage and inheritance of property chu an thukhawm a. March thla a Mizoram Legislative Assembly in he dan a pass tawh chu fel lo a tam avangin an ennawn a ni.
He dan hi pass anih lai la la khan mipui lamah sawiselna a tam nghal hle a, a tuk lawka assembly neih chhunzawmah pawh chief minister Lalduhawma chuan social media a sawiselna tam tak a awm avangin tlanchhe lehnghal aw in a famkim loh thu pawh a sawi bawk.
He Dan hi pawm anih hnu lawk khan Mizoram Kohhran Hruaitute Committee, Council of Churches, Mizo Language Development Board, MHIP, MUP, Women Commission leh Mizoram Bar Association chuan Assembly speaker hnenah he Dan passed tak hi ennawn ngenna lehkha an thehlut nghe nghe a. Hetiang anih avang hian dan hi ennawn ngei a lo tul ta a ni.
Engpawh nise dan tha lo, kan assembly in a siam hi ennawn leha siamthat mai theih a ni a. Mahse, hetianga dan passed tawh ennawn ngai, siamthat leh ngaia siam hi kan Assembly House mualphona a ni. Dan siam hi a har a, uluk pawh a ngai. Chuvangin Dan siam a nih dawn chuan mithiam te an rawn a, a nghawng theih tur mipuite ngaihdan pawh uluk takin an thlir thin. Sawrkarin ngaihtuahna fim tak hmangin Dan lam thiam te a rawn tur a ni a, chutiang chu tunhma atanga sawrkar kalphung awm sa pawh a ni bawk.
Kan sawrkar hian inkhualtelem niawm taka thil kalpui mai hi a ching hle niin a lang a, a tuk lawka siamthat leh ngai Dan siamtu hi hruaitu tha an ni ngai lo tih hi an hriat reng a ngai.
Cabinet Committee a sawrkar agenda-te pawh hi uluk taka department in a zir chian a, a thumal te te an remkhawm thleng hian fimkhur a ngai hle. Chumi hnuah Law lamah thil pawi thei a awm em tihte enfiah tir leh vek phawt a ni thin.
Tun sawrkarah hian Cabinet Agenda phuahchawp deuh deuh, a hnua en that leh ngai a awm nual thin niin sawi a ni a, heng thil hi sawrkar mualphona a ni. Kan sawrkar kengkawhtute hian tawngpawng basa ngama thil tih buan buan an chin chhung chuan mualphona hi an hmachhawn zel ang.