Thla hnih hnua 2026 World Cup tan turah FIFA chuan referee 52 an thlang a, an thlang chhuah zinga pahnih chu hmeichhia an ni.
United States, Mexico leh Canada-a intihsiakna awm tur atan hian Nilainiah khan khawvel huapa football thuneitu sang, FIFA chuan referee list a tar chhuak a, chutah chuan hmeichhe pahnih, American Tori Penso leh Mexican Katia Garcia chu an tel a. Hmeichhe pathum assistant referee atana thlan an ni a, pakhat chu video match official atana thlan a ni bawk.
World Cup-a hmeichhe referee an tel vawi hnihna a ni a, kum li liam taah khan Qatar-ah hmeichhe referee pathum leh hmeichhe assistant referee pathum an lo tel tawh bawk a. Penso-i hi 2023 Women’s World Cup final-a referee kha a ni.
FIFA chuan thlan chhuah an nih chhan hi a tha tha thlan hmasak tih kalphung an hman thin vang a nih thu a sawi.
Referee chief Pierluigi Collina chuan, “Hmeichhe match official paruk ngawt thlan an ni hi hmeichhe refereeing lama hmasawnna kan duh avanga kum li liam ta Qatar-a kan lo chin tan tawh chhunzawmna a ni,” a ti.
He intihsiaknaah hian FIFA chuan match official 170 zet an inlan dawn tih an sawi a, hengte hi referee 52, assistant referee 88 leh video match official 30 te an ni a. Hei hi 2022-a match official 139 aiin an tam zawk a ni.
2026 World Cup hi a lian ber tur a ni a, tel thei zat an tipung a, team 48 an tel tawh a, inkhel pawh 104 lai a awm dawn a, ram pathumin an inthlen tawm hmasak ber tur a ni bawk.
2022 World Cup a tel referee thahnem tak chu he World Cup-ah hian an inlan leh dawn a, kum li liam taa final-a referee Polish Szymon Marciniak pawh a tel ve leh dawn a ni.