Ivan Toney chuan Saudi Pro League-a referee-te rorel dan dik tawk lo chu a sawisel a, Al Ahli-a a khelhpui, Galeno pawhin he inelnaah hian mi pakhatin nomawi a lak an duh niin a sawi bawk.
Al Ahli player Toney hian Al Nassr striker Cristiano Ronaldo chu Saudi Pro League referee-ten league nomawi laktir ngei an duh hle niin a sawi a. Portuguese forward hian December, 2022-a Saudi Arabia-a a insawn atangin league nomawi a la la miah lo a ni.
Kar kal ta Nilainia Al Fayha nena 1-1-a an inhnehtawk tum khan Al Ahli player-te chuan penalty vawi hnih pek loh niin an inhria a, he result vang hian pathumnaah an tla thla a, hmahruaitu, Al Nassr, khelh khat hmabak la nei mek lakah point liin an hnufual ta a ni.
Galeno chuan X-ah, “Nomawi hi pe mai rawh se, chu chu an duh dan a ni,” tiin a tar lang a. “Engti kawng pawhin championship atanga min theh chhuah an duh a, mi pakhat hnenah trophy hi pek an duh a ni, kan club an zah lo hle a ni,” a ti.
Tuin nge hemi atanga hlawkna hmu tih zawhna chhangin Toney chuan Al Nassr hming lam chhuak kher lo mah se inkhelh bân interview-ah, “Tu nge a nih kan hria. Tu nge kan um mek?” tiin a sawi.
England international, kar laihawla league goal 27-na thuna Saudi Pro League-a goal thun tam ber ni mek chuan VAR-in a endik hnuah pawh penalty an dilna an hnawl chu mak a tiin pawi a ti hle.
Toney chuan, “Sawi zui hlawh ber chu penalty pahnihte kha a ni. A chiang hle a ni. Kuta ball ken kher em ni an phut? Khatiangah khan penalty inpe dawn nge dawn lo?” a ti.
A sawi zelnaah, “Chiang em em chu referee rilru a pangngai lo a ni, kha kha chu penalty chiang tak a ni. Mahse, tun ang hun pawimawhah chuan rilru an thlak leh si. A chhan ka hre lo,” a ti.