Aizawl: MNF Treasurer Lalruatkima chuan MNF an sorkar chuan buhfai man an ennawn dawn tih a sawi.
Ningania Sunrise Building-a AMC Ward IX chhunga Women Front inhmuhkhawmna hun a hmanpuinaah MNF Treasurer Lalruatkima chuan, ZPM sorkar hian inthlahrung hauh lovin an insawi ang letling chiahin sum an puk ngar ngar a. Hei hian leiba nasa takin a tihpun avangin phurrit nasa tak thlen tu an nih mek avangin, an neih tawk a inrenchem taka khawsak thiam mipuiin an inzir a tul ta zawk a. “Kan budget aia leiba kan ngahte hi thil la thleng ngai lo thil mak a ni,” a ti.
Lalruatkima chuan AMC inthlan lo awm turah party dangte aiin MNF-in candidate an nei that zawk chu an hlawhtlin pui an ring hle tih sawiin, “Party dang candidate te pawh kan han thlir a, MNF candidate te an tluk lo nasa hle a ni,” a ti a. An candidate zingah AMC corporator/councillor thin mi pali awmin, Secretary Govt of Mizoram pension, sport lama India ram aiawha mekte, kohhran upa, bial K|P Leader leh YMA hruaitute, Zoram thalaite entawn leh ngaihsan rawn te an awm niin a sawi.
Buhfai man a let a an ti to hi MNF hian na an tih thu sawiin MNF Treasurer chuan, “Kan sorkar chuan kan ennawn dawn a ni,” a ti a. Aizawl capital Thenzawla chief minister-in sawn a tum hi a dik lo tih sawiin, “Thenzawla state capital sawn duh leh duh lo kan indo mek a ni. Aizawl state capital a la nih zel duh lamin hnehna kan chan ka ring a ni,” a ti bawk.