North Korea hian an ram khawhchhak tuipui kam atangin tuipui hawiin ballistic missile tam tak a enchhin niin South Korea leh Japan chuan an sawi.
Pathiannia thil thleng hi North Korea-in kumin chhunga ballistic missile a kah vawi sarih a ni a, April thlaa a vawi lina a ni bawk.
South Korean sipaite chuan thuchhuah siamin missile-te hi Pathianni zing dar 6:10 (India-a zing dar 02:40) velah North Korea khawchhak lam tuipui kama Sinpo khawpui bul atanga a ni tih an sawi a. Ngun zawkin an thlithlaia , US leh Japan nen pawh an inhrilh tawn tih an sawi.
Japanese sorkar chuan social media-ah ballistic missile-te hi Korean Peninsula khawchhak lam tuipui kam bulah a tla nia rin a nih thu a tar lang a. Japan-a exclusive economic zone-ah hian lut a awm lo tih an finfiah bawk.
South Korean presidential office chuan emergency security meeting an neih thu a sawi niin chanchinbute chuan an tar lang.
Ralthuam enchhin hi United Nations Security Council-in North Korea missile programme hrekna bawhchhiatna a ni a. Ram tam takin an kawmserh ram hian UN-in a hrekna hi hnawlin mahni inven theihna dikna a neih a bawhchhia niin a sawi.
May thla laihawla China leh US-in summit an neih tur inbuatsaih laia thil thleng niin summit-ah hian China President Xi Jinping leh US President Donald Trump ten North Korea chungchang an sawiho dawn.
North Korea hian nuclear ralthuam siam turin ‘nasa takin’ hma a la a, uranium enrichment facility thar a neih belh a rinawm thu International Atomic Energy Agency hotu, Rafael Grossi-a chuan a sawi.
Thla hmasa tawp lam khan North Korean hruaitu, Kim Jong Un-a chuan a ram chu nuclear ralthuam nei ram a nihna tihdanglam theih loh a nih thu sawiin, ‘mahni invenna tur nuclear ralthuam’ tihchak chu an ram venhimna atan a pawimawh tih a sawi.