ZPM Media Chairman B. Lalchhanzova’n Aizawl Municipal Corporation (AMC)-ah an sorkar chuan mipuite chhawr theih tur asset lian siam kawngah nasa taka hma an lak tur thu a sawi.
Inrinni khan Aizawl Press Club-ah thu thar thehdarhtute kawmin B Lalchhanzova hian, AMC sorkar kaltaah an party-in corporator pasarih neiin tluang takin an hun an hman theih thu a sawi a. An corporator-te report atangin AMC sorkar kalta khan a duhsak lem loh thu leh MNF AMC sorkarin an corporator-te ward chu an lo vil thuah niin a sawi.
ZPM thupuangtu chuan Mizoram Municipalities (Ammendment) Act, 2015 Section 75 (A)-in a sawi anga khawpui chhunga mi retheite tana sum dah thin chu a taka hman a nih dawn thu a sawi a. AMC dawr har lutuk te, sawipuitu tha nei te tan chauha thil tih awlsam anga ngaih thin AMC hi mi tin ban phaka hnuhhniam an tum tih a sawi a. Hei bakah AMC-in mipui atanga a sum khawn hrang hrang te langtlang taka hman tum a nih thu te, Aizawl khawpuia cheng municipal area chhung ni si, tun thlenga PHE connection la nei ve lote tan a kaihhnawih department nen tangrualin pek vek an tum tih te, Aizawl khawpui chhunga vawk vulh khapna dan ennawn an tum tih te, ran talhna (slaughter house) siam an tum tih te, Solid Waste Management Center tihchangtlun tum a nih thu te, building permit leh lei laih permit (SD&SM) ennawn an tum thu te a sawi a. Aizawl mipuite chu ZPM party candidate-te vote theuh turin a ngen.
Mizoram Universal Health Care Scheme (MUHCS) chungchang sawiin B Lalchhanzova chuan, “Mi tam takin an tangkaipui mek a, kan state-in a neih tawhah chuan tuna healthcare scheme aia tha hi a la awm lo niin a lang a. MUHCS hi mi tin huap, khua leh tui nihna nei ten an hman vek theih tur a ni a, opposition emaw ruling emaw tumah he scheme hian a thliar lo a. MNF leh Congress mipuite hi an party hotute hian an lainat lo hlein kan hria a, an party mi ten hmang ve lo se an ti zawk em ni aw a tih hial theih a ni. Keini chuan MNF leh Congress party mite pawh an puten MUHCS hi sawisel mah se, he healthcare scheme hi tim miah loa hmang tangkai vek turin kan ngen a ni,” a ti.