Aizawl: MNF General Headquarters Treasurer Lalruatkima’n Aizawl Municipal Corporation (AMC)-ah sorkar ngelnghet din turin candidate an neih that ber tum a ni tih a sawi.
Inrinni khan Aizawl Press Club-ah thu thar thehdarhtuteb kawmin Lalruatkima chuan, naktuka AMC inthlanna neih turah MNF candidate zingah AMC corporator lo ni tawh te, sorkar, kohhran, kohhran thalai leh infiamna bakah NGO hrang hranga mi tha tak tak, Zoram thalaite entawn leh ngaihsan rawn te an nih hlawm thu sawiin, mipuiin vote vek turin a sawm.
Lalruatkima chuan AMC inthlanah Mizoram khawpui sawn duh leh duh lo buk an nih dawn tih a sawi a. Chief minister-in Mizoram khawpui Aizawl chu mi cheng an tam tawh avangin leh traffic tawt lutuk avangin, state capital mi nuai 10 chen theihna tur hmun danga din tura ruahmanna a siam hi an duh lo tih sawiin, “Tun laia tourist tam takin Aizawl khawpui traffic nawmzia an rawn hmu a, YouTube hmangin sum siam nan an hman mek laia, Mizoram khawpui hmun dang a sawn tum a ni hi kan duh lo a. Tun tumah hian state capital sawn duh leh duh lo buk a ni dawn a ni,” a ti.
ZPM sorkarin leiba salah Mizoram a hruai lut tih sawiin Lalruatkima chuan, “Budget session hnuhnung berah pawh kan hriat angin kan budget pumpui Rs vbc 17,076.92 niin Mizoramin leiba kan neih erawh chu Rs vbc 19,085.15 lai a ni ta mai a, Rs vbc 2,008.23 zetin budget aiin leiba a tam zawk a ni,” tiin, leiba sala Mizoram hruai luttu, ZPM sorkar hi mipuiin an hnawl ngei a ring tih a sawi.
ZPM chu sum enkawl kawngah hlawhchhamah puhin Lalruatkima chuan, Lunglei khawpui hmasawnna tur LMC sum chu a zawnin (FY 2024-25)-ah Rs nuai 923.12 leh FY 2025-26-ah Rs nuai 946.80 belhkhawmin Rs nuai 1,869.92 lai an ti-lapse a. Hei bakah hian AMC sum Rs nuai 1,526.60 lai an ti-lapse bawk a. Tun financial year tawpah sorkar inthlahdah avang liau liauin ram hmasawnna hnathawhna tur SASCI sum Rs nuai 11m152.00 zet a lapse bawk tih a sawi a. Restricted tender chungchangah pawh MNF kum nga sorkar aiin ZPM sorkar kum hnih chuang awrh chhung hian restricted tender-in hna an pe tam tawh zawk tih a sawi bawk.
MUHCS-ah sorkar hnathawk, CSS leh pensioner-te tihluihna hmanga do let tura an ti chu pawi an ti takzet tih sawiin Lalruatkima chuan, mipui support hlawh lo, MUHCS-ah hian April 14 thleng khan mi 29,472 chauh an la inziak lut a. A chhan ber nia lang chu sumdawng rilru pua enrollment man tam lutuk vang nia a hriat thu a sawi.