Aizawl: Mizoram Pradesh Congress Committee Treasurer Dr. Lalmalsawma Nghaka chuan Aizawl Municipal Corporation (AMC)-ah hian Pathian leh mipuite zara chakna an chan chuan mipuite chhawk zangkhai zawk tur leh mipuite phurrit ni lo tur AMC din an tum thu a sawi.
Aizawl Press Club-ah Inrinni khan thu thar thehdarhtute kawmin MPCC treasurer chuan, “Aizawl khawpui hi Zofate Jerusalem a ni a, kan Jerusalem enkawltu tur kan thlan turah hian Congress party chuan kan mipuite hi lal ber se kan duh a. Party dangte aia Congress party danglamna pakhat chu, lainatna nen dan kan kengkawh thin a ni. Tuna AMC dan hmanlai tam takah hian mipuite tan harsatna a tam em em a, min chhawk zangkhai tur zawka kan ngaih AMC chu mipuite tan phurrit a nihna a tam hle a ni,” a ti.
Congress party candidate-te danglam bikna sawiin Dr Lalmalsawmna Nghaka chuan veng leh khawtlang rawngbawlna kawnga tawnhriat nei tha tak tak, mipuite tana hun pum rawng lo bawl tawh thin te an ni tih a sawi a. AMC corporator atana thlan tlin an nih phawt chuan mi tin ban phak an ni dawn a, mi nawlpuite ban phakin thlan tlin an nih chuan awm an tum dawh tih a sawi a. Mi tin tana hero ni thei turin theihtawp an chhuah dawn tih a sawi bawk.
MPCC treasurer chuan Congress party hian mi harsa zawk te, rahbi tleu laklawh te khaichhuah lehna tur policy an duang thin a, a tihlawhtling turin theihtawp an chhuah thin tih sawiin, “Party dangte aia an danglam bikna chu thutiam hlen kawngah a ni,” a ti.
Aizawl khawpui hi khawpui thang mek a nihnaah enkawl uluk a ngai tak zet tih sawiin Dr Lalmalsawma Nghaka chuan, “Thutiam hlen thin party kan nih avangin Aizawl mipuite beiseina pawh hi party dangte aiin Congress party-ah a sang lehzual a ni,” tiin, Congress party chuan Aizawl khawpui nuam zawk, fai zawk, changkang zawk, ralmuang zawk siam an tum tih sawiin, an thil tum hi a lo hlawhtlin theih nan Aizawl mipuite Congress vote vek turin a sawm nghal.