Chief Minister Lalduhoma’n Thawhlehnia Aizawl Municipal Corporation (AMC) inthlanna neihah a tlem berah ZPM chuan seat 16 an lak a rin thu sawiin, seat awm zawng zawng pawh hui vek thei dinhmunah an ding niin a sawi.
He thu hi nimina AMC inthlanah zing dar 9 pelh hretah Govt Comprehensove Middle School, Chawlhhmunah vote a thlak zawha thu thar thehdarhtuten an kawmnaah chief minister hian a sawi a. ZPM chu AMC inthlanah sorkarna an chan ngei a beisei thu a sawi a, tunhnaia ZPM party beihna hrang hrang an tawh chu an party thatna vek tur anih thu sawiin, ZPM an sorkar chuan Aizawl khawpuiin hma a sawn phah a beisei thu leh AMC tha zawk chu an intiamna a nih thu a sawi.
Lalduhoma chuan state sorkar leh Municipal chu thawhho ngai anih avangin inlungrual taka an awm a ngai tih a sawi a, kawng tam taka hmasawnna turah thawh dun a ngaih avangin ZPM sorkar ngei a ngaih thu a sawi a, opposition lamin sorkar an thlawp that tawk loh thin avangin ruling lai thlan tlin mai chu hmasawnna tha zawk leh awlsam zawk anih thu a sawi.
MNF President ni bawk Zoramthanga chuan nimin zing dar 7 khan Ramhlun Venglaiah vote a thlak a. Vote a thlak zawhah thu thar thehdarhtuten an kawmnaah AMC inthlanah hian beiseina sang tak an neih thu a sawi.
Chief minister hlui, Zoramthanga chuan, term hnih AMC-ah mumal taka sorkarna an siam chu fakawm an tih thu sawiin, “A tlangpui thuin sawisel pawh a hlawh lo khawp. State sorkarah ZPM sorkar chu an term chanve an hmang a, mipuii, sorkar hnathawk leh mi rethei zawkte sawiselna a tam a. Chuvangin, Aizawl khawpui mi an changkannaah leh an finnaah, engkim an hmuh chianna hmunah chakna kan neih ngei ka ring,” a ti.
MNF candidate te chu a thlanna tura tun tum zet tluka uluk an la neih ngai loh thu a sawi a. Party dang ai chuan candidate an nei tha ber avangin sorkarna an siam thei ngeiin an inbeisei tih a sawi bawk.
MPCC President Lal Thanzara pawhin nimin chawhma dar 10 vel khan Govt. Combined Middle School, Zarkawtah vote a thlak.
Vote a thlak zawha thu thar thehdarhtuten an kawmnaah Lal Thanzara chuan, tun tumah an tanrualna a that bakah an candidate-te an chhuanawm a, rorel tham chu an tlin ngei an beisei tih a sawi.
Lal Thanzara chuan AMC inthlanah an lo tling a nih chuan an manifesto angin, Aizawl khawpui chenna tlak, bawlhhlawh sawngbawl dan awmze nei, in hmun pek dan awlsam zawk, traffic management tun aia fel zawk leh thil dang tam tak, an manifesto an tihlawhtling dawn tih a sawi.
Mizoram Chief Minister ni rei ber (tum 5), Lal Thanhawla pawhin chhun dar 12:30 vel khan Zarkawt Babutlanga Govt. Combined Middle School-ah vote a thlak.
Vote a thlak zawha thuthar thehdarhtuten Zoram mipui leh politician-te hnena a thuchah duh an zawhna chhangin, dik taka engkim tih hi a tlo ber a, dawt chuan ke a nei lo a, a tlu leh mai thin a ni, tiin, “Dik na na na chu a chhe thei lo a, a tlu thei lo a ni,” a ti.