Aizawl: Mizoram State Sports Council (MSSC) kum 50-na, Golden Jubilee chu Thawhtanni khan R. Dengthuama Hall, Mualpuiah lawm a ni a. Khuallian MSSC President Lalnghinglova Hmar, Sports Minister ni bawk chuan Mizoram leilungfate zingah Olympian pahnih chauh an la awm chu tlawmthlak a tih thu a sawi.
Lalnghinglova Hmar chuan MSSC hruaitu hmasa thahnemngai tak takte thawhrim rah ropui tak an tel a. Golden jubilee an lawm rual hian kum 50 lo awm leh tur, centenary hmel an hmuh hun atana an hmathlirte hi an ngai pawimawh dawn tih a sawi a. Mizo zingah infiammi thaa tak tak an nei tawh a, chutih rualin international chu sawi loh national level-ah pawh an hlawhtlinna a la beitham hle a, tan an lak nasat a ngai a, theihtawp chhuah an tum a, tum mumal tak nen hma lam pana ke pen an tum tih sawiin, kalphung tha zawk leh felfai zawk a awm theihna theihtawp an chhuah a, thurawn pawh an lak theih reng thu a sawi.
MSSC president chuan Mizoram leilungfate zingah Olympian pahnih chauh an la awm chu tlawmlakthlak a tih thu sawiin, “India ramin kum 2036-ah Olympic thlen a tum a, hemi hun a lo thlen hi chuan Mizo thalai thahnem tak India ram aiawha an tel theihna turin hmathlir mumal tak nen hma kan la mek a. Olympic-a hlawhtlinna kan hmuh theihna tur ni a kan hriat sports discipline pariat thlan bik kan neih a, theihtawp chhuahin hma kan la mek a ni,” a ti bawk.
Golden Jubilee lawmna inkhawmah hian chief minister hlui, Lal Thanhawla, MSSC president hlui MLA ni lai mek, Robert Romawia Royte, Jeje Lalpekhlua MLA, Lt. Col. Clement Lalhmingthanga MLA, MSSC President hluite Zodintluanga Ralte, Lalrinsanga leh Rualchhina bakah sawm bik mi pawimawh tak takte, MSSC hnuaia affiliated State –level Sports Association hrang hrang aiawhte an tel a ni.
MSSC hi April 20, 1976 khan executive order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni a. Tun dinhmunah MSSC hnuaiah hian state level sports association 34 an inziak lut a, jubilee pual hian kum khat chhungin sports association tin hian Mizoram pum huap tournament pakhat theuh hlawhtling takin an buatsaih tawh nghe nghe a. Mizoram State Sports Council President hmasa ber chu khatih laia education minister, Dr. H. Thansanga a ni.