Aizawl Municipal Corporation (AMC) inthlan kan zo a, vote la chhiar a nih loh avangin sorkar-na siam thei tur kan la hre rih lo. Heti a ni chung hian sorkar-na siam thei tur erawh kan vote thlak dan enkualin a lang ruak emaw chu aw a tih theih deuh.
AMC-ah hian sorkar thar a ding ngei dawn a, eng party pawhin sorkar-na lo siam se mipui hian kan beisei leh duhna a sang chho hle dawn tih erawh a chiang a, Aizawl khawpui enkawl tur hian kan duh fir dawn mai bakah kan thikthu pawh kan pe chhe dawn bawk.
Inthlan hma zawnga an campaign auhla hrang hrangte kha kan vawng reng dawn a, chumi mil chuan min kaihruai em, min kalpui dan tur kawng a dik em tih thlengin enzui an hlawh tawh dawn a ni.
Hetiang a nih avang hian engpawhin sorkar-na siam se langtlang leh dik, mipuite hmakhua ngai an ni tak zet em tih thlengin kan teh dawn a, an chet dan pawhin a zir chhoh viau a ngai ngei ang.
AMC atang hian MLA election thleng pawhin a nghawng chho lovang tih a sawi theih loh a, AMC a sorkar-na siamtu party apiang chu MLA inthlan kan hmachhawn leh hun atana kan tehna hmasa tur leh kan buk chhoh tur a nih dawn avangin sorkar thar siamtu party tupawhin mipui beisei anga an chet leh thawh chhoh a tul ngei dawn e.