Aizawl: Mizoram Larsap, General Vijay Kumar Singh chuan Thawhlehni khan Department of Library & Information Science, Delhi University dinchamphaphak vawi 80-na, Convention Hall, Vice Regal Lodge, Delhi University campus-a neih chu khuallian niin a hmanpui.
Hemi puala thu a sawiah Larsap General Singh chuan public library leh lehkhabute ngaihhlutawm leh tlo zia sawiin, tunhma anga ngaihhlut an hlawh tawk ta lo chu veiawm a tih thu a sawi a. Europe ramten public library an dah pawimawh dante sawiin, entawntlak a tih thu a sawi a. Larsap chuan kalkhawmte chu tun hma anga library ngaihhlut nachang hre thar leh tura chahin, “Tun hi library hlutna thar thawh leh hun chu a ni,” a ti.
Larsap chuan library chu ram hmasawn nana inghahna pawimawh tak anih thu a sawi a. Zirna kawnga India sulhnu ropui tak takte chhuanawm a tih thu sawiin, Nalanda University chu zirna lama sulsutu pawimawh tak a nih thu a sawi a. Department of Library and Information Science, Delhi University te’n kum 80-na hmel an hmu chu a lawmpui thu sawiin, an kalzelna turah duhsakna a hlan.
He hun hi Delhi University Vice-Chancellor Prof. Yogesh Singh chuan a kaihruai a ni.