Aizawl: Fisheries Department leh Tlabung Branch YMA te leh No-Fishing Zone Sub-Committee tangkawp chuan April 28-30, 2026 chhunga Khawthlang Tuipui, Tlabung a Community Fish Harvesting Event (Sangha Man Runpui) buatsaih chungchang an sawi ho.
Thutkhawm hi Fisheries Department Joint Secretary Zonunthari hova neih a ni a. Ruahmanna siam danin he sangha man runpuiah hian a ni khatna chu nghakuai a man tur a duan niin, a ni hnihnaah len hmangin an man thung dawn a ni.
He event atan hian registration hawn tawh niin, nghakuai pakhat zelah Rs.100 a in register theih a ni a, nghakuai hi pakhat aia tam chiah phal a ni dawn a. Len hmanga man erawh chu mipui nawlpui ni lovin a thiam bik ten an ti ang. A ni thumna chu tualchhung mite tan bika hun hman a ni ang. Nghakuai chiah bikah hian a man lian ber, man hnem ber, best woman angler, man zinga naupang ber leh upa ber lawmman te siam a ni ang.
Fisheries Act hnuaiah sangha humhalhte hi kum thum dan zelah man runpui ang hi phal a ni a. Tlabungah hian kum 2022 khan hetiang ang program hi lo siam tawh a ni a, tun tumah hian Mizoram puma open event angin siam a ni chho ta a ni.
Lena mante hi kg hnih hnuailam chu chhuah leh vek tur a ni ang.
He hunah hian a hmunah sangha hi man tlawma zawrh nghal tura ruahman a ni bawk.