MNF party chuan Aizawl Municipal Corporation (AMC) inthlan neih zawh taka vote tla a tlem chu inthlanna buaipuitu sorkar hlawhchhamna kawng khatah an ngaih thu an sawi.
Nilainia an thuchhuahah MNF chuan, AMC inthlan 2026 neih zawh takah vote tla tlem erawh a pawi an tih thu sawiin, “Democracy rama mipuiin kan duhna kan lantirna kawnga thawkchhuak kan tlem hi inthlanna buaipuitu sorkar hlawhchhamna kawng khatah kan ngai,” tiin, mipui hriat tur puanzarna leh inzirtirna kawnga tih tur tih tawkloh vangah an ngaih thu an sawi.
MNF chuan AMC inthlana vote nei tura inngai, AMC E-Roll 2026-a awmlo, vote thlak tura kal hawihai ta eng emaw zat awmte hi a pawi an tih thu an sawi a. 61.14% chauh vote thlak an ni hian a bak vote thlak lo 38.86%-te duhthlanna ai a awh dawn tihna a ni a, a huap kim tawk lo hlea an hriat thu an sawi bawk.
Hei bakah venhimna lam thawktu, state danga duty mek mi tam tak vote thlak thei lova siam an ni hi a pawi an tiin, rim taka ram himna atana thawktute dikna chanvo rahbehna leh democracy kalphung zah lohnaah kan ngai tlat a, hetiang hi thleng nawn tawh lo se an duh tih an sawi.
Mipui chanvo duhthlanna lantir a, vote thlak zawng zawngte chungah leh duhsakna nena MNF candidate vote-tute chungah lawmthu an sawi a. MNF candidate-te tana theihtawp lo chhuahtu party mipui leh neutral atanga thahnem ngaihpuitu, Aizawl chhung leh pawna tha thlah hauh lova thawktute chungah pawh lawm thu an sawi a. Inthlanna buaipuitu DC, police, MPF etc. te leh mipui hriat tur puangzartu media mite chungah lawmthu an sawi bawk.
Tluang tak leh him takin vote chhiar a nih ngei an beisei tih sawiin, vote tla chhe tak karah Pathian leh mipui duhsakna changin sorkarna siam ngei an inbeisei a. Mipuite lalna leh zalenna AMC din a nih ngei an beisei tlat tih an sawi bawk.