Lee Sharpe-a chuan Manchester United enkawl lailawktu, Michael Carrick chu Sir Alex Ferguson-a tactic hman thin, hlauhawm leh khauh taka rorel thiamna chu hmang ve turin a ngen.
United winger hlui hian Leeds United laka result duhawm lo tak an neih hnuah Carrick-a tan hian intihhlauhawm lehzual a ngai niin a ring.
Carrick hian United squad rintlak loh deuhte atanga theihna tha ber phawrh chhuak turin Sir Alex-a mizia a pho chhuah a ngai tiin Sharpe-a hian a hrilh a. Manager a nih tanna tha hle mah se tun hnaia Leeds United laka an muala 1-2-a an tlawmna chuan player-te rilru put hmang chungchangah zawhna lian tak a siam.
Sharpe-a chuan Ruben Amorim a chhuah hnua Carrick-a nungchang dam thlup mai chu a tirah boruak thar leh hahdamthlak ni mah se tunah chuan player-ten enkawl dan khauh zawk an mamawh tawh niin a ngai a. Red Devils hi tun dinhmunah Premier League-ah pathumna an ni mek a; mahse, an inpekna a tlahniam tih hriat theihna inkhelah chuan an tal buai thei hle thung.
Sir Alex-a hun laia chanchin ropui tak tak an neihte kha a thuneihna hman thiam vanga din a ni a, chu mizia chu tun dinhmunah Old Trafford-ah a kim lo niin Sharpe chuan a hria a. Carrick ang mi tha chungchuang pawh hian player-ten theihna an hloh chang chuan a player-te a tihthaih ve thiam a ngai tiin a sawi.
Sharpe-a chuan, “Carrick leh Sir Alex te hi chu miziaah chuan inang lo tak, letling thawk an ni. Carrick-a hi chu a dam hmel khawp mai a, a lo luh tirha a chettlat danah pawh player-ten an sawi tawh hial reng a. Club a zawm atangin tha takin a kuah khawm a, an theihna theuh a hmuhchhuahsak a. Player a nih lai pawhin mi tha chungchuang a ni a, mipa a nihna angin mi tha a ni bawk, hei hi a manager hnaah pawh a chhunzawm zel ang,” a ti.
“Sir Alex-a erawh chu a danglam hlak a, player-te hlauh turin a awm a, chu mi hmang chuan ro a rel thin. A lo lut a, mi zawng zawng a tithlabar a, team hriam leh hlauhawm tak a siam a. A team innghahna kha tluk rual a ni lo va; mahse, mi dang zawng zawng chungah thu a nei a, chu chuan team atangin hlawhtlinna a phawrh chhuak a. Manager a nihna anga Sir Alex-a record hi chu tuma hnial rual a ni lo. A tha berah chuan Carrick hian Sir Alex-a atang hian a changa player te nawr kal nan a tih dan khan a tih ve a ngai a, chu chu Leeds nena an inkhelh lai leh a hnu lama an mamawh tak chu a ni,” a ti bawk.