Aizawl Municipal Corporation (AMC) inthlanna neih zawh takah vote tla zat zaa 62.77 a ni. Home voting kaltlangin vote zaa 93.71 a awm.
Boruak muanawm tak hnuaiah Thawhlehni zing dar 7 atang khan AMC inthlanpui atan vote thlak tan a ni a. Tlai dar 5 thleng vote thlak hun hi hawn niin, tluang taka vote thlak hi zawhfel a ni.
Vote tla zat hi a vaiin 1,46,719 (mipa 66,415 leh hmeichhia 80,304) a ni a. Polling station pan thei lo kum upa te, damlo natna khirh bik nei leh pianphunga rualbanlo te tana vote thlak theihna tura ruahman, home voting chu April 13, 2026 atanga April 16, 2026 thleng khan kalpui a ni a, vote tla 2,768 (93.71%) a awm a ni.
Tun tum inthlanpuia hman tak electoral roll-ah hian voter awm zat chu hmeichhia 1,29,650 leh mipa 1,10,335 an ni a, an vaiin voter hi 2,39,985 an awm a, mipa aia hmeichhia an tamna chu 19,315 a ni.
Voter tamna ber ward hi Ward XVIII niin voter 18,906 an awm a. A tlemna ber chu Ward VIII niin, voters 7,975 an awm thung.
AMC hnuaiah hian ward 19 awmin, AMC inthlanpui 2026-ah hian INC, MNF leh ZPM te chuan ward 19-ah candidate an nei vek a; BJP erawh chuan ward 11-ah candidate an nei thung.
Candidate-te hi an vaiin 68, hmeichhia 27 leh mipa 41 an ni a. Ward paruk, heng – Ward II, IV, V, XI, XII leh XVII chu hmeichhe tana reserved ward an ni.
AMC hnuaiah hian local council 89 leh polling station 264 a awm mek a. AMC inthlanpui 2026-ah hian Electronic Voting Machine hman niin VVPAT (Voter Verifiable Paper Audit Trail) erawh hman a ni lo.
AMC inthlanpui hi felfai, thianghlim leh langtlang taka kalpui a nih theih nan, polling station tina hman tur EVM leh vote thlak buaipuitu tur polling personnel-te hi computer hmanga 1st, 2nd leh 3rd randomization kaltlanga thlan chhuah, thliar hran leh sem darh (randomize) an ni a. Vote thlak zawhah EVM-te hi general observer leh political party aiawhte hriatpuina hnuaiah DC Office Strong Room-ah dahluh leh vek an ni ang.
AMC inthlanpui result hi April 27, 2026 zing dar 8 atanga chhiar tan tura ruahman a ni a. Re-poll ngai a awm a nih chuan April 23, 2026 zing dar 7 atanga tlai dar 5 chhungin re-poll neih a ni ang.