Aizawl: MZP chuan Mizoram Board of School Education (MBSE)-in High School Leaving Certificate (HSLC) 2026 result hun reilo te chhunga an peih fel thei leh result fel fai tak an tichhuak thei chu fakawm tiin, an thawhrimnaah lawmthu an sawi.
Nimina an thuchhuahah MZP chuan, kumin HSLC exam-ah hian zirlai 18,257-in exam an hmachhawn a, chung zinga mi 14,663 ten hlawhtlinna an chang a. Pass percentage chu 80.31% a ni. Nikum 2025 khan HSLC pass percentage chu 76.68% a ni a, MZP-chuan hmasawnna nasa takah a ngaih thu an tar lang.
MZP chuan martic exam a zirlai hlawhtlinna chang zawng zawngte an lawmpui thu an tar lang a, Compartmental chance nei zirlai 117-te pawh nasa zawka inbuatsaih chhunzawm turin a ngen a. Chu tih laiin, hlawhtlinna chang zo ve ta lo zirlai 3,477 te a tawrhpui tak zet a, a lehpekah chuan hlawhtlinna chang ngei tura bei sauh sauh turin a fuih bawk.
MZP chuan kum 1995 atanga kum tin a lo tih thin angin, HSLC Top-10 a Mizo tlingte a chhuanzia leh duhsakna lantir nan leh Mizo zirlaite inkarah inelna thianghlim a awm theih nan, April, ni 28, 2026 hian Vana pa Hall-ah HSLC Top-10 a Mizo tlingte chawimawina hun a buatsaih leh an tum a ni.