Aizawl: Ningani khan Excise & Narcotics Department chuan Quarterly Crime Review Meeting an nei. Crime Review Meeting hi Z. Lalhmangaiha, Commissioner of Excise & Narcotics-in a kaihruai a, District 11 atanga Department hotute theuh bakah Senior Officer-te an tel kim a ni.
He Crime Review Meeting hi C. Lalruaia, MPS, Secretary to Govt. of Mizoram, Excise & Narcotics Department chuan a hmanpui a. Excise & Narcotics Department officer-te chu fuihin, “Min mamawhtute tana hnathawk theia awm hi a pawimawh. Kan awmna tur hmuna kan awm chuan kan theihna pawh tihpunin a awm ang,” a ti.
Excise & Narcotics Department Commissioner, Z. Lalhmangaiha ho hian zu leh ruihhlo khuahkhirhnaa hmalak mek dan thlirin khauh zawka dan kenkawh dan tur an sawiho.
Kum 2026 chhungin Excise & Narcotics Department rakzu litre 20,426.214, zu bilh lai tin 47,388, zu siamna bungbel 1,147, dawidim kg 38.700, IMFL litre 5,765.380, beer litre 12,990.610, FML litre 20.700 leh BEDC litre 200.400 an man tawh a.
Hei bakah heroin Kg 7.865, ganja Kg 91.298, methamphetamine Kg 51.386, khuh damdawi tablet 22,069, nitrazepam tablet 9,370, clonazepam tablet 3,371 leh tramadol tablet 5,270 an man tawh bawk.