School Education Minister Dr Vanlalthlana chuan MBSE-in HSLC result a tihchhuah takah sorkar school hmasawnnaah lawmawm a tih thu a sawi.
Dr Vanlalthlana hian a office chamber-ah thuchah sawiin, MBSE buatsaih, HSLC Examination 2026 result ruahman lawk anga tihchhuah a ni ta chu lawmawm a tih thu a sawi a. Zirlai exam hmachhawn mi 18,257 atanga za zela 80.31 laiin hlawhtlinna an chang thei leh nikum aia pass percentage a sang a, zaa 80 lai a kai thei chu lawmawm a tih thu a sawi.
Minister chuan kumin HSLC result chhuakah hmasawnna lawmawm tak sorkar school-ah a lo lang tih sawiin, nikuma sorkar school a pass zaa 68.01 chu kumin hian khumin zaa 72.07 an pass a, candidate zawng zawng an fail vekna school-ah RMSA School la nei nual mah se, sorkar school tih hmingpu an lang tawh lo leh zaa za an pass vekna school-ah kum dang aia sorkar School an lang tam a, sorkar school 21 zet an lang chu lawmawm a tih thu a sawi a. “Kan result hian zirlaite tan sorkar school a belhtlak tih a rawn tarlang a ni,” a ti.
Dr Vanlalthlana chuan kumina result tihchhuah dan chu a lo puanzar tawh angin kum dang aia a danglam thu leh top ten leh division te an lan tak loh thu te, MBSE website-ah erawh zirlaiten an mark leh percentage an en zung zung theih thu leh hei hi board dang pawhin an kalpui dan a nih thu a sawi a, hei hian a tha zawnga nghawng a neih chhoh zel a beisei thu a sawi.
Minister chuan zirlai hlawhtlinna chang thar zawng zawngte thinlung taka a lawmpui thu leh an hma lam hunah hlawhtlinna an chan zel theih nan duhsakna sang ber a hlan a. Hlawhtlinna chang zo ta lote pawh beidawng mai lova nasa zawka tan la sauh sauh tur leh result lawmawm nei thei ngei turin a chah.