Khua a ro in, thal a na a, mei si chhuakin ram a tikang duh tih hrereng chungin kan nun kan uluk lo thin a, kan chetvelna kan enzui tha peih lo a, a nghawng chu na tak a ni tawh thin. Tin, kangmei a chhuah hian inven thiam a har a, hamhaih a awl a, helam kawnga inzirtirna te hi sorkar hian nei nasa zual se a tha hle bawk. Keimahni lam pawh fimkhur turin i tangrual zel ang u.
Kangthelh motor kan neihte a bei tham si a, tunlaiah phei chuan tui thlengin a harsa zual nen, kan chan a chau tak zet. Heti lam kawnga hmalak zung zung a hunin, nakin zel hun thlir thiam ram hruaitu kan mamawhna a sang hle bawk a ni.
Engtik hunah nge kan tawn ve dawn a, kan hmalam hunah eng anga nasa kangmei chhuak nge kan la tawrh dawn a hriat loh a, sorkar hian kangthelh motor mai ni lo, tuia kan hnianghnar theihna tur ruahmanna lian tham hi siamin, bawhzui nghal char char se la, tui hi kan nunna, kan himna leh min chhanhim theitu a ni tih hrereng chungin hmalakna lian tham leh tih tan nghal zung zung hi nei mawlh teh se.
Kangmei tuar nasa khuate awm theih a ni tih hriain, a theih ang anga chhawmdawl thei turin kan sorkar hotu sangte hi inruahman thei se la, mamawh huna an thu leh hla tlang bik zia pawh a hrechiangtute vek kan ni e.