Mut hunbi siam Zana i mut hun thin pangngaiah mu la, zing thawh hun i bitukah thawh tum ang che. Kar tir atangin he tihdan hi zawm la, hman leh awl tak avanga rei tak tak movies en hi chin loh a tha. Alarm Clock tel lova tho zat zat thei i nih phei chuan awhawm tak i ni tawh.
- Mut bak a ngai lo
Mut i tumna kha TV en loh vang te, hnathawh loh vang te, lehkhabu chhiar loh vangte etc. ang kha ni lovin, mut duh vanga mut tawp mai tur a ni. I taksa leh rilru khan mut nen bak inzawmna nei suh se.
- Mut dan tur ruahman
Rilru leh ngaihtuahna tibuai thei – Hripui, chhungkaw inkar, hna leh thil dangte hian tui taka mutna tur hi an dang buai hneh viau mai a. Mei i tih thih hnua chhun lama i thil tihte ngaihtuah kir a, a tuka tih tur i dap kual chiam a nih chuan a tha ber chuang lo.
- Mut hmâ minute 90 la awma inbual
Tui luma inbual hian taksa lumna a tisâng a, chumi hnua lumna lo tlahniam leh khan mut a tichhuak ve thei tlat. Bawnghnute lum pip pep in a tha bawk e.
- Mut laia riltam a tha lo
Mut dawn a ruaia thil ei teuh a pawi theih ang bawkin pum ruaka mut pawh a tha chuang lo. Zanriah hi chu a awm mawi tawk chauha ei thin ni se, dar 9 vela mut tum tan dar 6 velah chuan zanriah ei hman ngei ni thei se duhthusam a ni.
- Mut hmâ darkar 4-ah ‘exer’ lak loh
Taksa insawizawina (exer) hian muttuina a thlen teh meuh mai. Amaherawhchu, zing leh tlaia neih chi a ni zawk a, zan lama inlak sek vak kha thil chuangliam a ni e.
- Thil tha lo laka insum
‘Caffeine’ awmna, thingpui leh coffee in loh tur a ni a, zu pawh lak luh loh tur. Insum thei ngang lo tan mut hmâ darkar 4-6-ah tlak fel a tha. Muttui duh vanga zu in hi a pawi a, tui takin i chatthla pawh a ni thei, a tukah erawh i harhvang chuang lo vang. Lû na bur leh bui chûkin i tho nulh ang.