Aizawl: Bangalore Mizo Association-in Bangalore-a hnathawk leh lehkha zir tumte fimkhur turin an chah.
An thuchhuahah BMA chuan Mizo thalai zingah bum an awm fo avangin Bangalore-a hnathawh tur hria anga social media-a insawi leh agent-te lakah fimkhur turin an chah a, hnathawk tura an kal hmain an thawhna tur company emaw, dawr emaw atangin thawk tura inremna lehkha leh appointment letter la hmasa tur te, ralkhata hnathawh tur an hmuhsak chu a hmun, an hlawh, a him leh him loh an hriat hmasak loh chuan thutlukna siam lo tur te, damlohna tawk thei vek an nih avangin health insurance emaw, medical insurance emaw tal nei ngei ngei tur leh khawsak a hautak avangin an kal hmaa an hnathawh tur chu lo zirchiang hmasa turin an chah.
Zirna chhunzawm tumte pawh admission an tih hmain college/institution dinhmun leh awmna hriat hmasak tum tur te, sum sen thlawn loh nan sum sen ngai zat chu an pek hmain an chawi tur zat hre hmasa tur te, website emaw, mahni ngei kalin emaw admission tih tum tur te, nursing zir tumte chu an zirna tur sorkar pawmpui a ni em tih hre hmasa tur leh private hostel-a awm tumte chu a hmunhma an hmuh hmasak loh chuan pawisa pe lo turin an chah.
BMA chuan Bangalore-a awmte chu an awm dan leh khawsak danah te, inleng neihah te, ei leh in thilah in neitute duh dan zahsak tur leh Mizo hming tichhe theia khawsa lo turin an chah a. Hna vang emaw zirna vang emaw awmte an member ni ngei turin an chah.