Aizawl: India-a sports minister-te inkhawmpui, ‘Chintan Shivir of Ministers of Youth Affairs & Sports of States/UTs’ chu April 25 leh 26, 2026 khan Srinagar-a Sher-i-Kashmir International Conference Centre (SKICC)-ah neih a ni. He hunah hian Mizoram Sports Minister Lalnghinglova Hmar a tel.
Ministry of Youth Affairs and Sports (YAS) buatsaih Sports Minister Conference hi Union Youth Affairs & Sports Minister Dr. Mansukh Mandaviya leh Minister of State Raksha Nikhil Khadse ten a bul atanga a tawp thlengin an uap a. Session pasarih awmin, Mizoram Sports Minister Lalnghinglova Hmar chuan, ‘Khelo Bharat Niti: Strengthening Centre State Coordination’ tih session a kaihruai.
Sports minister Hmar chuan Indian sports kalphung inthlak mek chu lawmawm a tih thu sawiin, “Olympic 2036 thlir chunga hmalakna chuan sports discipline zawng zawng a huam thei dawn lo va, Olympic medal beiseiawmna discipline te thlur binga duat bik an ngai. Kan kal dan ngai renga kan kal chuan kan result pawh a ngai reng dawn a, hmasawn tur chuan thlak ngai a awm thin,” tiin India-in sports a kalpui dan a thlak a tul thu a sawi.
Sports Authority of India siam that tul a tih thu sawiin, Delhi atanga thutlukna siam mai lovin state hrang hranga sports official leh association te zin chilh thin turin sorkar laipuia sports hotute a sawm bawk.
Infiammite hmasawn nan coaching lama hnasawn hmasak a pawimawh tih sawiin Lalnghinglova Hmar chuan Olympic Games 2036 hmathlir nei chungin kum 2024-ah Mizoram Sports Conclave buatsaih a nih thu leh, Bana Kaih ‘Empowering Mizoram Sports’ hnuaiah naupang kum 8–15 inkar tan state pum huapa coaching kalpui mek a nih thu a sawi a. School Education Department nen tangkawpin ‘Grassroot Sports Development Programme’ hnuaiah school naupangte sports coaching pek an nih thu sawiin, age group inelnaa kum dik lo awm thin tibo tura Mizoram hmalakna a sawi lang bawk.
Ni hnih awh Sports Minister Conference-ah hian sports kaihhnawih thupui hrang hrangah India dinhmun leh hmasawn ngaihna laite thlirho niin, Olympic 2036 tinzawnin sawihona tam zawk hi kalpui a ni a; zirna in leh sports kaihkawp, training facility changtlung zawk neih, sports technology leh sports science tihhmasawnte chu ngaihpawimawh zingah a tel.
Talent development mumal leh inphaman zawk neih te, sports inrelbawlna (governance) felfai zawk te, sports bungrua tha zawk siamchhuah leh thalai kaihhnawih thil dangte conference-ah hian sawiho a ni.
Sports Minister ‘Chintan Shivir’ 2026-ah hian state 15 atangin sports minister an tel a ni.