Bengal-a police-te chuan North 24 Parganas district-a Jagaddal-a tharum thawh thlenga a titua puh mi 15-te chenna in an dap hnuah Thawhtanni tuk khan rorel lai, Trinamool Congress (TMC) party worker pali an man.
An man zinga pakhat chu khum hnuaia a biru man a ni a. Police-ten an zawn laiin mi dang pathumte hi tlanchhiain man zui an ni ta tho bawk.
Mi mante hi Pathianni zana TMC thlawptute leh eptu pawl, BJP-te inkara tharum thawhna thleng vang a ni a, Prime Minister Narendra Modi-a’n inthlan thawh hnihna campaign-a Barrackpore-a vantlang inkhawm a neih hmaa thleng a ni a. Jagaddal leh Barrackpore-ah venhimna tihchak zual a ni.
Tharum thawhna hi prime minister-in a tlawh tur tar lanna flag leh poster pawh thlak a nih hnuah thleng nia sawi a ni.
BJP worker-te chuan TMC mite chu an campaign thil tichhiaah an puh a. Boruak sosang zuiin Jagaddal Police Station hmaah party pahniha mite an pungkhawm a, lungin an tawng a, an insual buai nasa bawk.
Tualchhung dan kengkawhtute chuan a tirah chuan tharum thawhna hi thunun tumin an bei nasa hle.
Election Commission chuan thuchhuah siamin police officer pension, Jagaddal-a inthlan chuh mekin thubuai thehluh a tum laiin ‘mi 200 vel police station-ah an pungkhawm’ niin a tar lang a. ‘Dan lova police station-a an lutin dan leh thupek kenkawh an tibuai’ niin a tar lang bawk.
EC chuan pungkhawmte hian CAPF mite pawh an bei a, CISF constable pakhatin hliam a tuar niin an sawi bawk.
Buaina hi punlun zelin Bhatpara biala ding tur, BJP MLA Pawan Singh-a chenna inah bomb a puak nia hriat a ni bawk a. Tualchher bomb vawm a ni a, mi pathumin hliam an tuar a, bungrua a chhe bawk.
Hetihlai hian National Investigation Agency (NIA) chuan South 24 Parganas-a Trinamool worker nia sawite hnen atangin tualchher bomb 79 hmuhchhuah a nih dan an chhui mek bawk.
Bengal assembly inthlanah hian thawh hnihna atan campaign boruak a sosang hle a, TMC leh BJP inkara inbeihna nia ngaih a ni a. A thawh khatna atan April 23 khan vote thlak a ni a, May 4-ah result puan a ni ang.