Buckingham Palace chuan Washington DC-a silai hmeh puah avangin venhimna lama harsatna awm mek karah King Charles leh Queen Camilla ten US an tlawh tur chu ‘ruahman angin’ kalpui a nih tur thu a sawi.
Pathianni khan thuchhuah siamin thutlukna hi ‘Atlantic tuipui kam lehlam lehlama sawihona hnuah’ siam a nih thu a sawi.
Tar lan tawh angin Inrinni zan khan Washington khualbula White House Correspondents’ Dinner-ah silai keng pakhatin silai a hmet puak a. US attorney general lailawk chuan mi sual hian US President Donald Trump-a beih a tum a nih a rinawm thu a sawi.
Palace chuan president, Melania Trump-i leh mikhual dangte chu hliam tuar lo an nih thu a hriat chuan King chu a thla a muang hle tih a sawi.
King leh Queen hian a mi mal takin Trump-a hnenah hian beih a tawh avanga an lainat thu an hrilh bawk.
Mipa pakhatin khualbuka hun hmanna hmuna luh a tum laiin silai vawi eng emaw zat a kap a, president nupa leh sorkar hotu lian dangte chu zanriah kilna hmun atangin hruai chhuah an ni a. US chanchinbute chuan silai hmet puaktu hi kum 31 mi, Cole Tomas Allen-a niin an tar lang a, man nghal a ni.
King leh Queen zinnaa venhimna chungchang hi sawi a ni tawh a, “Inrinni tlai lama thil thlengte hian eng chen nge zin turah nghawng a neih theih’ tih sawiho a ni tawh tih Palace chuan a lo sawi tawh.
US attorney general lailawk, Todd Blanche-a chuan ni li awh tura British lal nupain an tlawh chhung hian King leh Queen chu him taka an awm ngei a rin thu a sawi a, NBC News hnenah Inrinni zana thil thleng hian US security system a tha tih a tilang niin a sawi.