ZPM Media Chairman B Lalchhanzova chuan AMC chu party invulh nan ringawt hman a tum loh thu a sawi.
Thawhtannia AMC inthlan vote chhiar zawha ZPM an tlin thu puan a nih hnu lawkah Aizawl Press Club-ah thu thar thehdarhtute kawmin B Lalchhanzova chuan, “ZPM chuan AMC hi party invulh nan ringawt hman a tum lo va, a chhe lai siam thatu ni tura thawk turin, Aizawl tha zawk, langtlang municipal sorkar din a tum a, Aizawl First tiin ZPM AMC chuan ro a rel dawn a ni,” a ti.
B Lalchhanzova chuan, “AMC result hian state sorkar mek, ZPM ministry hi mipuiin an rin tawkzia a tar lang a, kan khawpui ber, Aizawla municipal sorkar siam tur pawhin mipuiten an ring tawk hle tih a tar lang bawk. Chuvangin, ZPM AMC chuan kan ram leh hnam tan, kan khawpui Aizawl leh mipuite hmasawn nan, election manifesto ang taka municipal sorkar tha din turin theihtawp a chhuah dawn,” a ti.
AMC inthlan zawh taka ZPM an chakna chhan langsual zual sawiin B Lalchhanzova chuan, manifesto duan kawnga ZPM chuan an la thu tak ber avang te, candidate thlan dan pawh an uluk ber avang te, an auhla langsarte chu mipui pawm a hlawh avang te a nih thu a sawi.
Kawngpui siam danah AMC inthlan dawn chauha siama sorkar puhna nasa a, AMC inthlan zawhah pawh sorkarin kawngpui a siam zel dawn a. Aizawl bik tinzawna kawngpui siam a ni lo tih a sawi bawk.
ZPM Media chairman chuan, “Mipuiten AMC an hmuh dan hi ZPM chuan tihdanglam a tum dawn a. Aizawl mipuite hian AMC thatna leh hlutna hi kan hre tawk lo hle. AMC kan neih tawh danah hriat theih tura tih tak taka hmalakna a tam lo pawh a ni thei. Engpawhnise, ZPM chuan Aizawl khawpui sorkar, mipuite tel vena din ngei a tum a ni,” a ti.
B Lalchhanzova chuan boruak muanawm tak hnuaiah inthlanna neih zawh takah hnehna sang tak mipuiin an chantir avangin Pathian leh Aizawl mipuite chungah ZPM chuan lawmthu an sawi tih a sawi a. Inthlan buatsaihtu, State Election Commission te, vote thlakna lama mawhphurtu polling party te, dan leh thupek kengkawhtu police te, MPF leh vote thlaktu mipui zawng zawngte chungah lawmthu a sawi a. He inthlana ZPM-in hnehna an chan ngei theih nana thawktu ZPM General Headquarters hruaitu te, minister leh MLA te, board chairman te, party level hrang hrang leh mi mal campaigner-te chungah lawmthu a sawi bawk.