Aizawl: Zirtawpni atanga hman tan, sorkar laipui Ministry of Social Justice & Empowerment buatsaih ni thum chhung awh review meeting ‘Chintan Shivir’ The Lalit Hotel, Chandigarh-a neihah Mizoram aiawhin Social Welfare Minister Lalrinpuii a tel.
Minister Lalrinpuii chuan ministry kalpui lai scheme hrang hrangte hlawk zawka kalpui a nih theihnana sawihona hrang hranga point pawimawh tarlan te chu ministry-in uluk taka lo ngaihtuah turin a ngen a. India ram chu hnam ze hrang hrang awmna, tawng leh sakhaw hrang hrang nei, sik leh sa thleng pawha inang lo tak takte chen khawmna a nih avangin an danglamna te hre reng chung a, scheme leh project kalpui dan tur duang thin turin a ngen bawk.
Mizoram chu ram inlungrual leh tangrual an nih thu sawiin Lalrinpuii chuan, “Thil thaah chuan mipui, sorkar leh tlawmngai pawlte tha taka an thawkho thin a, chu chuan ram mipui tana hmalaknaah hlawhtlinna a thlen thin,” a ti a. Mipuiten an ta neih tak tak theih scheme leh project siam a pawimawh thu a sawi.
He thutkhawmah hian Ministry of Social Justice & Empowerment hnuaia hmalakna hrang hrang thlirho a nih bakah hmachhawp hrang hrangte chak zawk leh tha zawka kalpui dan tur te sawi ho a ni.
He hunah hian Union Minister Dr Virendra Kumar, Union Minister of State BL Verma te bakah state hrang hranga Social Welfare leh a kaihhnawih Department changtu Minister te leh department official-te an tel a ni.