Nigeria hmar lam laili, Kogi State-a silai kengten sorkara inziak lut lo hnuchham enkawlna hmun an luhchilhnaah 23 an ru bo va, an zinga naupang pariat chu an chin an hriat loh a ni tih thuneituten an sawi.
Kogi-a Information Commissioner Kingsley Fanwo-a chuan security agency-ten ‘rang tak leh awmze neia an chhan let nghal’ avangin naupang 15 chu chhanchhuah an nih thu a sawi.
Pathiannia pawi khawihna thlengah hian a hmun neitu pawh hruai bo zingah a tel tih a sawi bawk.
He thilah hian pawl engmahin mawh an phur tih an la sawi lo va; mahse, venhimna thuneitute chuan state chhungah Boko Haram cell chak tak an awm a, tharum thawhna pawh an thlen fo tawh niin an sawi.
Nigeria hian ram chhung hmun tam takah ruk bo buaina a tawk mek a, mi sual pawlte chuan tlanna atan mi an ruk bo thin a. Sorkar chuan tlanna pek chu dan kalh ti mah se inruk bo hi a tlem phah lo.
Fanwo-a chuan, “Sorkar chuan chhanchhuak turin hma a la chhunzawm zel,” a ti.
Thawhtannia a thu a chhuahah hnuchham enkawlna hi ‘thuneitute hriat lohvin hmun rem lo takah’ dan lova kalpui a nih thu a tar lang bawk.
Fanwo-a chuan naupang enkawlna hmun, sikul leh hetiang chi hmun enkawltute chu ‘tun ang venhimna boruak muanawm lovah’ chuan sorkar agency remchangte nena ti zel turin a ngen nghal.
Nigeria-ah hian sikul naupang a hlawma ruk bo hi thleng fo a ni a, a bik takin an ram hmar lamah chuan a thleng fo va. Tun hi hnuchham enkawlna beih a nih vawi khatna a ni.
November, 2025 khan hmar lam laili, Niger State-a Catholic Secondary School pakhat atangin zirlai 300 chuang leh an zirtirtute chu ruk bo an ni.
Hlawm hniha chhuah an ni a, chhuah hnuhnung zawkte chu thla khat chuang zet hnuah an zalen chauh a ni.
Sorkar chuan tlanna engmah pek a ni emaw, inremna siama Boko Haram commander pahnih chhuah zalen zawk emaw a nih thu sawi chu a dik loh thu an sawi.