India ram rorelna in sang zawk chairman-in Aam Aadmi Party (AAP) MP pasarihten an zawm a phalsak hnuah rorel lai, BJP chuan Rajya Sabha-ah member 113 an nei ta a. AAP hian an party chhuahsantu MP-te hi an member nihna hlihsak an dilna erawh chhanna a la awm lo.
Thawhtanni khan Rajya Sabha secretariat chuan rorelna in sang zawka party-te dinhmun hriattirna a tichhuak a, party pahnih inzawm (merger) chu Chairman CP Radhakrishnan-a’n a phalsak thu a tar lang a. BJP kaihhruai tangrual, National Democratic Alliance (NDA) chuan member 245 awmna house-ah hian 149 an nei ta a, BJP bikin 113 an neih zingah hian nominate panga an tel bawk.
Zirtawpni khan AAP MP pasarih – Punjab atangin Raghav Chadha, Sandeep Pathak, Ashok Mittal, Harbhajan Singh, Vikramjit Sahney, leh Rajinder Gupta leh Delhi atanga Swati Maliwal te chuan BJP nena inzawm an tum thu an puang a. Rorelna in sanga party pakhat MP 10 zinga hmun thuma thena hmun hnih an tlin avangin anti-defection law hnuaiah an member nihna hlihsak theih an ni lo nia sawi a ni.
Pathianni khan AAP chuan an MP helte chu member an nihna hnawl dilna an thehlut tho va. AAP parliamentary party leader Sanjay Singh-a chuan danin party tak tak zawk (original) member hmun thuma thena hmun hnihten party dang an zawm chauh phal a nih avangin dan a tling zo lo niin a sawi.
Congress chuan Rajya Sabha chairman-in AAP MP pasarihte BJP nena an inzawm a pawm chu ‘thil mak a ti lo’ an ti a. “Mak tih tur awm chhun zawk chu hun rei tak a daih a, kartawp khan pawm a ni zawk kha a ni,” tiin Congress General Secretary in-charge Communications Jairam Ramesh-a chuan X-ah a tar lang.
MP pasarihin an zawm tak avang hian BJP leh NDA chuan rorelna in sangah hian hmun thuma thena hmun hnih an hnaih ta hle a. Kumin kum tawpah seat 30 dang a ruak dawn a, BJP hian panga tal an neih belh theih an inbeisei.
Congress party-in 29 neiin Rajya Sabha-ah party lian ber pahnihna an ni a, TMC-in 13 neiin an dawt a; DMK-in pariat; YSRCP-in pasarih; Biju Janata Dal-in paruk; AIADMK-in panga leh Janata Dal (United), Samajwadi Party leh Nationalist Congress Party tenpali theuh an nei bawk.