Mizoram Board of School Education (MBSE) chuan Nilaini khan Higher Secondary School Leaving Certificate (HSSLC) 2026 Examination result a tichhuak a, zirlai 12,243 zinga 10,734 an pass a. Pass percentage chu 87.67 niin nikum (81.10%) aiin zaa 6.57-in a sang zawk.
HSSLC result chhuakah hian exam beitu 12,243 awmin, 156-in exam an hmachhawn lo va. Arts stream-ah exam beitu 8,714 awmin zirlai 7,575 an pass a, Science stream-ah exam beitu 2,770 awmin zirlai 2,472 leh Commerce stream-ah exam beitu 759 awmin zirlai 687 an pass.
Arts bikah a pum puia mark hmu sang berin full mark 500-ah mark 466 a hmu a, Science-ah mark hmu sang berin mark 462 a hmu a, Commerce-ah mark hmu sang berin mark 463 a hmu.
HSSLC exam result chhuakah candidate zawng zawng pass vekna, Arts-ah school 64 a awm a, Science-ah 14 awmin Commerce-ah 16 an awm.
Hetih lai hian candidate zawng zawng fail vekna Arts-ah pakhat awmin Science leh Commerce-ah an awm lo.
District malah chuan Arts-ah Serchhip district pass percentage a sang ber a, zaa 91.86 a ni a, Science-ah Kolasib niin zaa 94.59 an pass a, Commerce-ah Hnahthial niin zaa 100 an pass a ni.
Kumin hian compartment 115 an awm a, result chhuah atanga ni sarih chhung thleng complain theih a ni ang.
Arts stream-ah sorkar school atangin zirlai 2,695-in exam hmachhawnin 2,166 (zaa 80.37)-in an pass a. Deficit school atangin zirlai 936-in exam beiin 875 (zaa 93.48) an pass a. Aided school atangin mi 523-in exam beiin mi 466 (zaa 89.1) an pass a. Lumpsum school atangin exam beitu 1,303 awmin zirlai 1,095 (zaa 84.04) an pass a. Private school atangin zirlai 3,188-in exam hmachhawnin 2,920 (zaa 91.59) an pass a, private-a exam beitu 69 awmin 53 (zaa 76.81) an pass a ni.
Science bikah hian sorkar school atangin zirlai exam beitu 622 awmin 508 (zaa 81.67) an pass a. Deficit school atangin exam beitu 522 awmin 495 (zaa 94.83) an pass a, Lumpsum school zirlai 20 zingah pakua (zaa 45) an pass a. Private shcool atangin zirlai 1,598 zingah 1,456 (zaa 91.11) an pass a. Private-a exam beitu pariat awmin pali (zaa 50) an pass a. Aided school atanga exam beitu an awm lo thung.
Commerce-ah hian sorkar school atanga exam beitu 285 awmin 249 (zaa 87.37) an pass a. Deficit school atangin exam beitu zirlai 174 awmin 162 (zaa 93.1) an pass a. Lumpsum school atangin zirlai 14-in exam hmachhawnin 13 (zaa 92.86) an pass a. Private school atangin zirlai 286-in exam hmachhawnin 263 (zaa 91.96) an pass a. Aided school atangin leh private angin exam hmachhawn an awm lo.
- Stream tina topper-te
ARTS STREAM
Lalnunhlui (St. Paul’s HSS)
SCIENCE STREAM
Lalmoipuia Lawmzual ( St. Paul’s HSS)
COMMERCE STREAM
Vanlaltleipuia (St. Paul’s HSS)