Aizawl: Electric Veng Branch YMA Literature & Education Sub-Committee-in Inrinnia zirlaite kawng kawhhmuhna, ‘Career Fair’ a buatsaih chu Home Minister K. Sapdanga’n a hawng.
Electric Veng YMA Hall-a hawnna inkhawmah thu sawiin K. Sapdanga chuan, Career Fair chu thil hautak, a buatsaihtu changkan ngai bawk, a kal te thil chik mi leh thil tih tak tak tum, hetiang ang mi te tana kawng kawhhmuhna hun tha a bial chhung ngei a, Electric Veng Branch YMA ten Career Fair an buatsaih thei chu lawmawm a tih thu leh chhuanawm a tih thu a sawi a. Tunhnaiah Mizote Central Service mai bakah SSC lamah lut an tlem ta hle a, an tan tlan a ngai tak zet a. Central lam dawr changa Mizo hnathawk an lo awm hian an tangkai thin zia a sawi bawk.
K Sapdanga chuan Career Fair-a tel zirlaite chu tum mumal nei chunga an lehkha zir chhoh zel nan hmang tangkai turin a chah bawk.
Career Fair hi zirlai naupangten lehkha an zir chhoh zelna turah kawng dik zawk leh ngaihtuahna fing tak an neih theihna tur leh nakkina eizawnna kawng an zawh hun a hlawhtlinna an neih theih nan a buatsaih a ni a. EYMA hnuaia Literature & Education Sub-Committee hian kum 2023-2025-ah te hlawhtling takin a lo buatsaih tawh bawk.
Career Fair-ah hian Arts, Commerce, Science, Special Education, Law, Mass Media & Communication, Management /Baking, Hospitality/ Tourism, Military, Territorial Army, Medical, Engineering, Handmade Business, Fashion Designing leh Cruise lama tui mite tan stall buatsaih a ni a. Stall-ah hian hetiang lama hlawhtlinna lo nei tawh, veng chhung mithiamte rawn theihin an thu a ni. Heng bakah hian Booktale, Beer Seba Group of Institutions, Medhavi Foundation, Women’s Polytechnic Aizawl, R&D Consultancy-te Career Fair-a tel turin sawm an ni bawk.
Career Fair-ah hian veng chhunga zirna in te bakah veng thenawmte leh sikul hrang hrang sawm an ni a, zirlaiten an hlutin tlawhtu an thahnem hle.