Myanmar sipaiin thlawhna hmangin Myanmar ram chhung, India ramri bula awm, Khawpuichhip beihna avangin mi 100 chuang an raltlan belh.
Zirtawpni khan Myanmar sipaite chuan Khawpuichhip hi an bei a. Thlawhna hmanga an beihna avangin civil mi pasarihin nunna an chân a, hliam tuar mi eng emaw zat an awm nia thudawn a ni.
Khawpuichhip bialtu, Falam township-ah hian nikum kum tawp lam atang khan Myanmar sipaite leh sorkar paihthlak tumtu CDF, PDF, HPO leh a dangte chu an lo inkap tawh a. Hei vang hian raltlan pawh Mizoramah an lo luh belh tawh thin a. Khawpuichhipah hian mipui sipai an inkulh lo nia sawi a ni.
Tun tum hi Mizoram ramri hnaia Myanmar sipaite thlawhna hmanga an chet tum thumna nia hriat a ni.
Khawpuichhip beihna avang hian Zokhawtharah raltlan an luh belh a. Thudawn danin, gate paltlangin mi 30 vel an lut a. Lui kana lut, mi thahnem tak awmin, an chin ngaihven mek a ni a. Raltlan hi mi 100 chuang an nih tawh thu dawn a ni.