Aizawl: Central YMA-in ruihhlo chi hrang hrang an hman khawm te chu Inrinni zing khan Home Minister K Sapdanga hovin an tiral.
Ruihhlo an tihralte hi Central YMA hnuaia ruihhlo do pawl, Central Anti-Drugs Squad (CADS)in January 20 – May 1, 2026 chhung ruihhlo an mante a ni a. Chungte chu Heroin (No.4) hawng 317, Tic Tac bur 1,185, Ganja gram 49.230, Codein bur 1215, AP, Pregabalin, Nap 10, etc. tablet 8401 leh zu (local) bottle 31 te an ni.
Central YMA Hall-a ruihhlo tihral a nih hma Central YMA Gen. Secretary Prof. Malsawmliana kaihruai inkhawmah thu sawii K Sapdanga chuan ruihhlo do kawngah sorkar leh tlawmngai pawl, a bik takin YMA-te thawhhona chu hlawhtling a tih thu leh thlamuanpuiawm a tih thu a sawi a. Sorkar hna hmun sàwma then a hmun kua hi tlawmngai pawlte zar a nih thu sawiin, excise minister-in ruihhlo dona a vei hle chu lawmawm a tih thu a sawi.
Ruihhlo do danah tharum nena bul tana, counselling nena hma lak zui zel chu tangkai a tih thu sawiin home minister chuan, hemi kawngah hian kohhran pawhin nasa takin hma an la tih a sawi a; hetianga an tanho zelna hian Mizo thalaite ruihhlo lakah a chhanchhuah ngei a beisei thu leh hmalakna thar atan khawlai thenfai hnatlang pawh neih leh thuai a nih tur thu a sawi.
Central YMA President R. Lalngheta pawhin thu sawiin, ruihhlo do kumpuan hnuaia CADS-te thawhrimna chu chhuanawm a tih thu sawiin, thalaite tichhetu ruihhlo lakah indo puan a nih thu leh thil thalo laka mahni inven reng a tul thu a sawi a. Ruihhlo tam tak man a ni tawh chu thalaite chhanchhuahna a nih avangin Pathian hruainaah lawmthu sawiin, taima tak leh rim taka an do zel chuan Pathianin hlawhtlinna a la pe zel dawn tih a sawi bawk.