Aizawl: Chief Minister Lalduhoma chuan Zo hnahthlak zingah Mizo nihnaah harh tharna a thleng mek niin a sawi.
Serchhip Sub-Headquarters YMA-in Thenzawl Auditorium-a Inkhawmpui vawi 8-na Zirtawpni zana an neih a hmanpuinaah chief minister chuan khawvelah hnam lungrual lo chu an din chhuah theih loh avangin, Mizo hnam peng zawng zawng lungrual taka an chenho theih nan sorkarin theihtawp a chhuah a, Manipur leh Chin hills lamah Mizo nihna chungchangah harh tharna a thleng mek tih a sawi.
Serchhip bialtu MLA ni bawk chief minister Lalduhoma chuan, hmanni lawkah pawh HPC-D (LF) te’n ralthuam an tun tan avangin Mizoramah hnam pual hel pawl an awm tawh lo tih sawiin, hengte hi YMA-te thawhrah a nih thu sawiin YMA chungah lawmthu a sawi bawk.
Hetianga Mizo hnam a insingsak mek lai hian Mizo thalai zingah hlawhtling tura rim taka thawh aiin an neih sum nuam tawl an awm mek te, din chhuah tuma intuaihriam peih lo te, hnam nun tichhe thei vek khawpa hlauhawm ruihhlo ngai an awm chu thil pawi tak a ni tih sawiin chief minister chuan, thalaite chu chhungril nun siam tha a, ruihhlo laka fihlim tur leh ram dang officer-te el pha tura National level competitive exam-te hmachhawn tam turin a fuih a, hlawhtlinna chang ngei thei turin taihmakna leh tumruhna nei turin a fuih bawk.
Lalduhoma chuan Thenzawl Peace City Project leh SASCI Green Field City ruahmanna kalpui mek a nih thute, Thenzawl-ah rel a luh thlen theih nan hmalak mek a nih thu te, Mat lui chu Multipurpose Dam tura khuah dan zawn mek a nih thu te, Aizawl leh Thenzawl inkar kawng chu National Highway nihtir tumin hma lak mek a nih thute leh Sialhawk-ah Multipurpose Hall sak a ni dawn a, N. Vanlaiphai Augmentation of Water Supply Scheme pawh trial run neih mek a nih thu te a sawi bawk.