Chief Minister Lalduhoma chuan Inrinni khan Mizoram Rural Bank Branch (MRB) Manager Conclave 2026 chu khuallian niin a hmanpui.
MRB Head Office-a hun hmanah chief minister chuan India rama regional rural bank thangduang tak, MRB, Mizote ta an nei chu hlu a tih thu a sawi a. CD Ratio nei tha ber pawl bank an ni reng mai chu chhuanawm a tih thu sawiin, bank-te CD ratio a san hian an sum dawn khawmte mipuite tan an pe chhuak tam tihna a ni a. Ram hmasawn nan chu chu a pawimawh tih a sawi.
Chief minister chuan bank manager-te chu sorkar policy a taka chantirtute an nihna chen a awm a. An flagship programme Bana Kaih-ah phei chuan an ni leh zual a. Ram hmasawnna tura tih theih an ngah hle a, an lakah beiseina an neih san thu a sawi.
Mizoramah financial literacy sang zawk mamawhna a nasa a, thingtlang lam mipuiin bank an mamawh em em a. An tana dawr awlsam leh zangkhai neih a tul tih sawiin chief minister chuan, “Heng kan mipuite mamawh phuhru theitu ber tur chu MRB-te hi in ni. In lo tih tawhte tha taka chhunzawm zel chungin zau zawka hma la zel turin ka ngen a che u. Nikum chhunga hmasawnna ropui tak in thawhchhuahah ka lawmpui che u a. In tan sorkar hi a ding reng tih hre chungin hmasawn zel i tum ang u,” tiin a chah.
Inkhawmah hian Isaac Lalfamkima Sailo, Chief Manager, P&OA chuan kalkhawmte lawmna thu a sawi a, Sheryl L. Vanchhong, Chairman, MRB chuan thu sawiin sorkar kum kal ta chhunga hma an sawnnate a sawi bawk.
MRB hian tun sorkar kum liamtaah khan deposit Rs vbc 6,526.10 an hmu a, an target Rs vbc 682.11-in an khum a ni. An loan pek chhuah zat hi Rs vbc 4,129.98 a tling a, an tlin zat tura an bituk hi Rs vbc 300 chuangin an khum a. Nikum chhunga an hlep hi Rs vbc 152.27 niin, an Credit Deposit ratio hi 63.28 niin, Mizoramah an sang ber a ni.
MRB hi September 27, 1983-ah a ding tan a, MRB-ah hian sorkar laipuiin share 15%, sponsor bank SBI-in 35% leh Mizoram sorkarin 50% an nei a ni a. Regional office pahnih bakah branch hi 106 an nei tawh a, chung zinga 60 chu thingtlanga awm an ni. Thawktu hi 491 an awm mek.