Ruihhlo kalkawnga awm kan ni tih a chiang a, ruihhlo man tam zawk hi kan ram ni lo, hmun danga ken tur a ni bawk.
Heti tak maia ruihhloin min luhkhung leh min chenchilh hi a pawi a, inven hi kan tihmakmawh a ni. Ruihhlo ti lo tur pawhin i inhrilh mawlh mawlh ang u.
Sorkar in theihtawpa ruihhlo a do thu kan hria a, kan ram hotu lu ber pawhin a sawichhuak fo. Kohhran leh khawtlang duh loh thil hi chu nasa zawka kan do sauh sauh pawh a ngai reng a ni.
Ruihhlo avang hian kan thalai tam takin an tawrh phah a, nun tawi phah ta an tam hle bawk. Chhungkua a nghawng a, khawtlang a rum a, ralpui beiha kan beih a, kan zavaia kan do tlan hi a ngai reng a ni.
Rawlthar chhuak chho tam tak hian intih changkan nan leh intih pa nan ruihhlo hi an khawih duh viau nite hian a lang a, hmeichhia aiin mipa kan tlem chhante hi ngun taka ngaihtuah zui ngai a ni ta!
Sorkar hian insumkar nei lek lovin ruihhlo hi do se la, a kalkawnga mi langsar leh neinung tak tak lo inrawlh an awm a nih pawhin kan ram leh hnam him nan man ngamin, an chungah thuneihna lek ngam mawlh teh se. Kan thalaite leh ram leh hnam hian chhan a ngai e.