Aizawl: MNF President Zoramthanga chuan, “AMC-ah MNF-in thil thaa bul tanin, danglam tha zawk a siam a. Chu chuan harsatna a siam thei a. Chu chu a tha lo zawngin MNF-ah min burbun a. Kan tawrh phah ta a ni,” tiin Aizawl Municipal Corporation (AMC) inthlanna neih zawh taka an party chak loh chhan a sawi.
Thawhtannia MNF Hnam Run chhung inkhawmah thusawiin chief minister hlui chuan AMC-a ni khat pawh la sorkar ve ngai lo ZPM chu mipui ngaihah chuan nula thianghlim ang an ni a. Aizawl bial zawng zawng hi ZPM bial a ni a, minister bial a ni deuh vek bawk a. Inthlan hmasa lamah an lo chak lo fo tawh bawk nen, theihtawp chhuahin tlin hrim hrim tumin an bei a, inthlan hun nasa taka pawtseiin mipui rilru hmin an tum a. Mipuiin MNF AMC tana sum an release duh lohte kha an hre ve si lo va, an chelh thei ta lo a ni, a ti.
MNF chuan sakawr chakna an ring ve ngai lo tih sawiin, “Tawlailir kan chhuang ngai hek lo. A rawngbawl tur leh chanchin tha hril tura Pathian din a ni. Kum 60 chuang min hruai tawhtu Pathianin kan chak lohna chu kan inzir nan leh kan inenfiah nan min hmansak zawk thin,” tiin, MNF vawrh kang turin hun kal tawhah zirlai a zirtir chang a nei thin a. Ram leh mipui ngaihsakna an neihte hi Pathianin an felnaah a ruatsak a, zam lovin an kal zel dawn tih a sawi.
Pathianin mipui tam tak awmna India ramah, passport leh visa ngai miah lova a rawngbawl turin MNF te hi a din leh ruat an ni tih sawiin Zoramthanga chuan, “Pathianin thil siam zawng zawngte hnena chanchintha hril tura min kohna hi MNF ten kan kalsan a thiang lova. Heti chin hi a tawk rih e, a tih chang a awm thin,” tiin, kum 60 chuang MNF-te hruaitu Lalpan a hruaina hi an tan a tawk a, a hluin a hlawk ber tih a sawi.