Aizawl: ZPM Vice President Lalmuanpuia Punte chuan AMC inthlana hnenah an chan theihna atana pawimawh ber chu an lama Pathian a tan vang niin a sawi.
Thawhtannia ZPM chhung inkhawma thusawitu, Adviser to Chief Minister Lalmuanpuia Punte, MLA chuan AMC inthlan zawh tak chungchang sawiin, kum 2010-a AMC hmasa berah Congress sorkar khan tangtualin ward 10 chiah an la a, AMC vawi hnihna leh vawi thumnaah pawh MNF-in ward 11 chiah lain an sorkar hram. Tun tuma ZPM hnehna thlir hian a sang fal hle a, a lawmawm hle tih a sawi.
Lalmuanpuia Punte chuan tun tum AMC inthlana ZPM chakna chu party bil chakna ni lo vin, neutral-ten an la thlawp hle tih a hriat tih a sawi a. Chutiang taka an thlawp theihna tura chak taka hna thawktu chief minister leh minister te, kawngpui tha petu leh healthcare scheme tha tak siamsaktute hi an thawh hlawk hle tih sawiin, “Hnehna kan chan theihna atana pawimawh ber chu Pathian kan lamah a tan vang a ni a. Pathian malsawm tlakin, Pathian lamah keini party hi tang zel turin party mipuite pawh kan khawsak dan i fimkhur zel ang u,” a ti.
Tun hnaia HPC-D (Lalhmingthanga Sanate Faction) leh sorkar inremna chungchang sawiin Lalmuanpuia Punte chuan, “Heng HPC-D (LF) tlem la awmte hian ramri hrul khuaahte inthlan dawnin mipui an la ti thlabar fo thin a, sorkar tan chuan chu thil chuan rilru a kap ru reng a, hetianga hnam bil hminga silai keng awm tawh miah lova sorkar leh HPC-D(LF) nen inremna kan nei thei hi kan lawm em em a. State ralmuang bera kan inchhal fona tih dik famkimna, a hling kan phawi kimna chiah a ni hi thil chhinchhiah tlak tak a ni,” tiin, Mizote hi tu mah inti hrang tham an awm lo va, an khawsakna hmun azirin Hmar, Lusei leh Paite-ah te an inchhal mai mai thin a. Mara leh Lai te pawh unau an ni a, an chhehvel Zohnahthlak unaute hi anniho hian an kuah khawm thiam poh leh an lian tulh tulh mai dawn niin a sawi.