Aizawl: BJP State Core Group member K Hrahmo, MLA chuan AMC inthlan neih zawh takah vote a tlak chhiat chhan chu Aizawl mipuiin ZPM sorkarah beisei an neih tawh loh vang niin a sawi.
BJP Mizoram chuan Thawhtanni khan an party pisa-ah Karthar Inhlanna leh Political Session hun an hmang a. Thusawitu K Hrahmo chuan AMC inthlan result kha ZPM tan lawmawm angin lang mah se, an solid thei lo kha a mak zawk a, a beisei an pha lo tih sawiin, “Aizawlah MLA an nei vek a, minister-te an nei fur bawk a, chuti chunga an solid thei lo kha a zahthlak a, inchhuanna tur chi ni lovin an MLA neihna bial vekah AMC seat hnih an chân a ni,” a ti.
K Hrahmo chuan ZPM-in a hun taka inthlan an ngam loh chhan chu artelukawn an hlauh vang tih sawiin, “VC/LC inthlan kha sawhthing lei hmain an sawn hma a, AMC inthlan erawh kawng siam hnuah an sawn thung a, chu an kawng siamna pawh mipui sum a la ni leh nghal a, thil man tihtlawm min tiam a, buhfai man an tisang a, electric bill, petrol leh a dangah a man an tisang bawk, thawhchhuah an neih loh vangin mipui min rawk hle a ni. Chumai ni lo vin, AMC-ah vote tla 66.77% a tla a, Aizawl mipuiin ZPM sorkarah beisei an nei tawh loh avangin vote pawh an thlak tha peih lo hial a ni,” a ti bawk.
Kum 2023 MLA inthlan lai khan Mizoram mipui leh kohhran thlenga thusawi thinten AAP that thu leh corruption-a an fihlim thu te, mipui tana an thil tih that te an sawi a, Pulpit-ah meuh an au chhuahpui a. Chutih mek laiin an ngaihsan em em AAP MP 10 zinga pasarihin BJP tha tiin an lut zawk tih a sawi.