Aizawl: DP&AR Minister K Sapdanga’n nimin khan Mizoram sorkara Commissioner leh Secretary-te thiamna tihpunna tur ‘Capacity Enhancement Training’ buatsaih a hawng.
Secretariat Adminstration Wing (SAW) Conference Hall-ah hun hmanah DP&AR Minister K.Sapdanga chuan, officer ten an theihna tihpunna tur training tha tak neih a ni chu lawmawm a tih thu a sawi a. iGOT Karmayogi platform hnuaia online-a zirna buatsaih tha taka an tel thin avang leh Sadhana Saptah (April 2-6, 2026) hnuaiah pawh Mizoram chuan hmarchhak state-te zingah pathumna dinhmun a hauh thei chu officer-ten an thiamna tihpun an duhzia leh hmasawn an tumzia tilangtu a nih thu a sawi.
Secretary-te hna pawimawhzia sawiin K Sapdanga chuan, roreltu mai ni lovin policy duangtu leh danglamna thlen theitu an ni a, Mizoram hmasawnna atana rorelna fawng pawimawh tak chelhtu an nih thu a sawi a. Officer-te pawhin an thiamna leh an theihna an tihpun ve zel a pawimawh tih sawiin, AI (artificial intelligence) chu tangkai taka an hman theih a beisei thu a sawi.
Minister K Sapdanga chuan Viksit Bharat 2047 zulzuia Mizoramin hma a sawn theihna turin officer-ten technology chhuak thar apiang thiam taka an hman ve zel theih a tul tih sawiin, department hrang hrangten thawhhona tha zawk an neih theihna atan pawimawh a tih thu a sawi bawk.
He training hawnna programme hi Chief Secretary Khilli Ram Meena chuan a kaihruai a ni.